Qindra banorë të qytetit të shkatërruar të Oleshky-t, në territorin e pushtuar nga Rusia në Ukrainë, janë evakuuar pas një armëpushimi humanitar të ndërmjetësuar nga Zonja e Parë e SHBA-së, Melania Trump.

Autoritetet ruse dhe ukrainase kanë konfirmuar se evakuimi u realizua të premten, pa incidente, ndërsa banorët që dëshironin të largoheshin patën një afat prej katër orësh për ta bërë këtë, shkruan BBC, transmeton Dukagjini.

“Gjithçka u zhvillua pa asnjë incident dhe të dyja palët vlerësuan nivelin e lartë të organizimit”, ka deklaruar ombudspersonja ruse për të drejtat e njeriut, Yana Lantratova.

Autoritetet ukrainase kanë bërë të ditur se personat e evakuuar fillimisht do të dërgohen në jug të Rusisë, prej nga do të vazhdojnë rrugëtimin drejt Ukrainës përmes Bjellorusisë.

Melania Trump ka deklaruar se të gjitha elementet e operacionit, përfshirë korridorin e sigurt për hyrje dhe dalje nga Oleshky, janë dakorduar bashkërisht nga udhëheqësit rusë dhe ukrainas.

Për evakuimin janë vënë në dispozicion 25 autobusë, me kapacitet për të transportuar deri në 750 persona, si dhe autoambulanca për njerëzit me lëvizshmëri të kufizuar. Operacioni është zhvilluar deri në orën 14:00 sipas kohës lokale.

Armëpushimi në të gjithë zonën e vijës së frontit në rajonin e Khersonit, i cili hyri në fuqi të martën, është përshkruar si më i gjati dhe më i gjeri që nga fillimi i pushtimit rus të Ukrainës në vitin 2022. Ai ka mundësuar edhe çminimin e rrugës që lidh Oleshky-n me zonat e tjera.

Megjithatë, disa qindra banorë kanë vendosur të qëndrojnë në qytet, pavarësisht shkatërrimeve të mëdha dhe mungesës së gazit, energjisë elektrike dhe ujit të rrjedhshëm.

“Çdo person që dëshiron të largohet nga Oleshky do ta ketë mundësinë ta bëjë këtë në mënyrë të sigurt. Në të njëjtën kohë, ata që vendosin të qëndrojnë do të mund ta bëjnë këtë dhe do të marrin të gjithë ndihmën e nevojshme humanitare”, ka deklaruar ombudspersoni ukrainas për të drejtat e njeriut, Dmytro Lubinets.

Për shkak të pozicionimit të forcave ukrainase, të cilat ndodhen rreth pesë kilometra larg Oleshky-t, banorët e evakuuar fillimisht duhet të kalojnë nëpër territorin e pushtuar nga Rusia dhe më pas të udhëtojnë drejt qytetit rus Anapa.

Prej aty, ata do të transportohen me një aeroplan të qeverisë ruse drejt Gomelit në Bjellorusi, për të vazhduar më pas me automjete drejt rajonit ukrainas të Chernihivit.

Ombudspersoni ukrainas, Lubinets, dhe homologja e tij ruse, Lantratova, kanë udhëtuar së bashku drejt Oleshky-t, duke u nisur nga Armiansku, në gadishullin e Krimesë, të pushtuar nga Rusia.

Sipas raportimit, Lubinets është zyrtari i parë ukrainas që ka vizituar pjesët e pushtuara të Ukrainës që nga fillimi i luftës. Ai pritet të bëhet gjithashtu zyrtari i parë ukrainas që do të vizitojë Rusinë, kur të shoqërojë të evakuuarit gjatë kthimit të tyre në Ukrainë të shtunën.

Bashkëpunimi i tij me përfaqësuesen ruse ka nxitur reagime në Ukrainë, ku disa persona kanë shprehur pakënaqësi për paraqitjen e tij përkrah një përfaqësueseje të autoriteteve pushtuese. Lubinets ka thënë se bashkëpunimi është bërë në interes të shpëtimit të jetëve.

Të dy zyrtarët kanë publikuar pamje nga Oleshky, ku kanë treguar se banorëve u është dhënë mundësia të ndahen në dy grupe, varësisht nëse dëshironin të shkonin në territorin e kontrolluar nga Rusia apo të ktheheshin në Ukrainë.

Ndërkohë, Rusia ka njoftuar se ka përgatitur dhjetëra tonë ndihma humanitare për banorët që nuk dëshirojnë të largohen, përfshirë ushqime, barna, produkte higjienike dhe karburant për gjeneratorë.

Melania Trump siguron armëpushim mes Rusisë dhe Ukrainës në qytetin e pushtuar Oleshky

Burimi: Dukagjini