Presidenti i Rusisë, Vladimir Putin, ka deklaruar se negociatat e ardhshme për përfundimin e luftës në Ukrainë duhet të përqendrohen te garancitë e sigurisë për të dyja vendet, si dhe te krijimi i një kuadri më të gjerë sigurie për Evropën.
Në një intervistë për televizionin shtetëror rus të enjten, një ditë pas takimit me të dërguarin e posaçëm amerikan, Steve Witkoff, Putin konfirmoi se Moska është e gatshme të rifillojë muajin e ardhshëm negociatat me ndërmjetësimin e Shteteve të Bashkuara.
Sipas tij, synimi i bisedimeve nuk duhet të jetë një armëpushim i përkohshëm, por arritja e një marrëveshjeje që garanton sigurinë dhe i jep fund konfliktit në mënyrë të qëndrueshme.
“Qëllimi i këtyre bisedimeve do të jetë garantimi i sigurisë së Ukrainës dhe Rusisë pas arritjes së marrëveshjeve të paqes, në formën e tyre përfundimtare, dhe jo përmes një armëpushimi të përkohshëm për një periudhë të shkurtër”, deklaroi Putin, duke shtuar se Rusia është e gatshme të rifillojë kontaktet për këtë qëllim.
Kreu i Kremlinit përsëriti gjithashtu qëndrimin e Moskës se negociatat duhet të përfshijnë arkitekturën e sigurisë evropiane në tërësi. Ai tha se Witkoff kishte theksuar rëndësinë e kësaj çështjeje dhe se ishte dakord me këtë qasje.
Sinjali – aty ku e vërteta flet para lajmit!
Burimi: Sinjali
