Një hetim për tentim vjedhjeje të rëndë në Kaçanik ka marrë një kthesë të papritur. Policia po hetonte një rast në shtëpinë e një gruaje, por gjatë grumbullimit të informacioneve zbuloi se bashkëshorti i saj mbante një pushkë gjuetie pa leje të vlefshme. Arma, sipas tij, ishte trashëguar nga vjehrri, ndërsa leja e dikurshme e UNMIK-ut ishte humbur.
Burimet e Sinjalit bëjnë me dije se bëhet fjalë për Nebih Belën, rreth 55-vjeçar, nga Kaçaniku, ndaj të cilit tashmë është iniciuar rast penal për posedim të paautorizuar të armëve.
Gjithçka ka nisur gjatë hetimit të një rasti të “Vjedhjes së rëndë në tentativë”, të ndodhur në rrugën “Idriz Seferi” në Kaçanik, në shtëpinë e bashkëshortes së tij.
Gjatë verifikimeve, hetuesit kanë siguruar informacione se Bela posedonte një armë gjuetie për të cilën nuk kishte leje të vlefshme.
Pas këtyre informacioneve, ai është ftuar për intervistim dhe ka pranuar se e mbante armën.
Por shpjegimi që ka dhënë për prejardhjen e pushkës ishte i veçantë: ajo i kishte mbetur trashëgim nga babai i gruas së tij.
Sipas deklarimit të Belës, për armën kishte pasur një leje të lëshuar gjatë administrimit të UNMIK-ut, por dokumenti i kishte humbur dhe nuk mund ta gjente më.
Policia ka sekuestruar pushkën e gjuetisë të llojit “Montecarlo”.
Veprimet policore janë zhvilluar më 21 tetor 2026, rreth orës 10:30, ndërsa për rastin është njoftuar Prokurori i Shtetit.
Pas konsultimit me Prokurorinë, ndaj 55-vjeçarit është iniciuar procedurë për veprën penale “Mbajtja në pronësi, kontroll ose posedim të paautorizuar të armëve”.
Nebih Bela është liruar në procedurë të rregullt, ndërsa arma ka mbetur e sekuestruar.
Kështu, një hetim që kishte nisur për tentim vjedhjeje në shtëpinë e bashkëshortes ka përfunduar me hapjen e një rasti tjetër penal ndaj burrit të saj.
Hetimet do të sqarojnë edhe statusin ligjor të armës dhe pretendimin për lejen e dikurshme të UNMIK-ut.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Sinjali – aty ku e vërteta flet para lajmit!
Burimi: Sinjali
