Elon Musk i është bashkuar një peticioni që kërkon rikthimin e bashkëthemeluesit të Nvidia, Jensen Huang, në pozitën e drejtorit ekzekutiv, pas dorëheqjes së tij të papritur nga gjiganti amerikan i teknologjisë.

“Një peticion për rikthimin e Jensen është duke u zhvilluar dhe unë gjithashtu po e nënshkruaj”, shkroi Musk në X.

Sipas Moneywise, deri më 14 nëntor, peticioni online i quajtur “Stand with Jensen” kishte mbledhur mbi 100 mijë nënshkrime, përfshirë më shumë se 5 mijë persona që deklarojnë se janë punonjës aktualë të Nvidia.

Huang, i cili bashkëthemeloi kompaninë në vitin 1993 dhe e drejtoi për 33 vjet, dha dorëheqje nga pozitat e presidentit, drejtorit ekzekutiv dhe anëtarit të bordit më 12 nëntor.

Largimi i tij erdhi pas raportimeve për marrëdhënie jashtëmartesore, përfshirë një lidhje me Alice Huang, ish-drejtuese e një kompanie në Singapor, për të cilën janë ngritur dyshime në raportime mediatike për lidhje të mundshme me inteligjencën kineze.

Jensen Huang ka pranuar se ka pasur një lidhje jashtëmartesore, por deri tani as ai dhe as Nvidia nuk janë akuzuar për ndonjë shkelje ligjore.

Autoritetet amerikane nuk kanë arritur në përfundim se Alice Huang ishte spiune, ndërsa Pekini i ka mohuar pretendimet.

Pas dorëheqjes, drejtimin e përkohshëm të Nvidia e ka marrë drejtoresha financiare Colette Kress.

Peticioni kërkon që bordi ta rikthejë Huang në detyrë derisa një hetim i pavarur të sqarojë faktet, si dhe të sigurojë transparencë për arsyet e largimit të tij.

Në mesin e mbështetësve të listuar janë edhe drejtues të njohur të industrisë së teknologjisë, përfshirë Tim Sweeney nga Epic Games dhe Garry Tan nga Y Combinator.

Musk ka shprehur publikisht mbështetje për Huang edhe në ditët para dorëheqjes, duke e cilësuar të rëndësishëm rolin e tij në suksesin e Nvidia. /Telegrafi/