Federata Sindikale e Punëtorëve Teknikë të Sektorit Privat të Kosovës (FSPTSPK) ka njoftuar se është arritur marrëveshja me Komunën e Prishtinës për kërkesën e punëtorëve teknikë të shkollave fillore dhe të mesme për zbatimin e pagës minimale.
Sipas njoftimit të Federatës, marrëveshja u arrit të enjten, më 5 nëntor, pas shtatë javësh, në një takim ndërmjet kryetarit të FSPTSPK-së, Jusuf Azemi, me bashkëpunëtorët e tij dhe nënkryetarit të Komunës së Prishtinës, Florian Dushi, i shoqëruar nga bashkëpunëtorët e tij.
Gjatë takimit, Dushi ka njoftuar se kërkesa për zbatimin e pagës minimale është aprovuar.
Po ashtu, ai ka konfirmuar se të gjitha obligimet financiare që ndërlidhen me këtë pagë, nga 1 gushti 2026 e deri më tani, do të ekzekutohen deri të martën, më 10 nëntor.
Të dy delegacionet kanë shprehur falënderimet dhe mirënjohjen për bashkëpunimin, ndërsa nënkryetari Dushi ka theksuar se Komuna mbetet e hapur për bashkëpunim dhe trajtimin e kërkesave të punëtorëve të sektorit privat.
Në fund, FSPTSPK ka falënderuar Komunën e Prishtinës për gatishmërinë për bashkëpunim, duke shprehur pritjen që zotimet e dhëna të realizohen brenda afatit të përcaktuar. /Telegrafi/
