Kompania OpenAI ka prezantuar modelin e ri të inteligjencës artificiale, GPT-6 Cyber, i cili është krijuar posaçërisht për sigurinë kibernetike dhe zbulimin e dobësive në sistemet kompjuterike.
Modeli i ri ka demonstruar aftësi të avancuara duke identifikuar afro 1.000 dobësi sigurie në Linux, si dhe dhjetëra probleme të panjohura më parë në shfletuesin Firefox.
Sipas OpenAI, GPT-6 Cyber është trajnuar posaçërisht për të zbuluar dobësitë e sigurisë, për të zhvilluar mënyra për testimin e tyre dhe për t’i ndihmuar programuesit në krijimin e përditësimeve që i eliminojnë këto probleme.
Në testin e performancës ExploitGym, modeli arriti rezultat prej 48.5 për qind, krahasuar me 32.1 për qind të paraardhësit GPT-5.6 Cyber, që paraqet përmirësim relativ prej 51 për qind.
Në një tjetër test, RemoteExploitBench, GPT-6 Cyber arriti të përfundonte me sukses 95 për qind të detyrave për zhvillimin e mënyrave të shfrytëzimit të dobësive.
Në rastin e Firefox-it, modeli identifikoi 81 dobësi të reja me nivel të lartë rrezikshmërie, si dhe 30 probleme të njohura më parë, të cilat rezultuan më serioze sesa ishte vlerësuar fillimisht. Mozilla tashmë ka publikuar përditësime për shumë prej këtyre dobësive.
OpenAI e ka klasifikuar GPT-6 Cyber në kategorinë “Critical” për aftësitë e sigurisë kibernetike, sipas kuadrit të saj për vlerësimin e rreziqeve.
Megjithatë, modeli nuk do të jetë menjëherë i qasshëm për të gjithë përdoruesit. Fillimisht, ai do të ofrohet përmes API-së dhe Codex-it për një grup të përzgjedhur klientësh të miratuar në programin Daybreak Red.
OpenAI ka njoftuar gjithashtu zgjerimin e programit Daybreak Blue, përmes të cilit organizatat dhe studiuesit e sigurisë do të kenë mundësi të përdorin modele të avancuara për testimin dhe mbrojtjen e sistemeve digjitale.
Kompania thekson se një prej prioriteteve gjatë zhvillimit të GPT-6 Cyber ka qenë që modeli të respektojë kufijtë e autorizimit të përcaktuar nga operatorët, në mënyrë që testimet të kryhen vetëm në sistemet për të cilat ekziston leja përkatëse. /Telegrafi/
