Presidenti ukrainas, Volodymyr Zelensky, ka deklaruar se përplasjet me presidentin amerikan Donald Trump nuk janë çështje personale, por ka paralajmëruar se afrimi me Vladimir Putinin dhe lehtësimi i sanksioneve ndaj Rusisë do ta forconin Moskën.

Marrëdhëniet mes SHBA-së dhe Ukrainës janë përkeqësuar ndjeshëm javët e fundit, pas vendimit të Trumpit për të lehtësuar disa sanksione ndaj Rusisë dhe njoftimit për një marrëveshje për blerjen e karburanteve ruse.

Në një intervistë për CNN në Kiev, Zelensky theksoi se kundërshton çdo lehtësim të sanksioneve, duke argumentuar se Putini nuk ka ndërmend ta ndalë luftën.

“Qëndrimi im ndaj Putinit është shumë i qartë. Nëse i heqim sanksionet, do ta bëjmë më të fortë. Kjo nuk është diçka personale mes meje dhe presidentit Trump”, tha ai.

Deklaratat vijnë në kohën kur administrata amerikane po përpiqet të gjejë një zgjidhje diplomatike për luftën në Ukrainë.

I dërguari i posaçëm amerikan, Steve Witkoff, zhvilloi një takim treorësh me presidentin rus në Shën Petersburg, ndërsa Putini ka rënë dakord për bisedime të reja në nëntor, pa dhënë shumë detaje.

Zelensky tha se nuk është i bindur për gatishmërinë e liderit rus për paqe.

“Është për të ardhur keq, sepse ai luan me jetët e njerëzve të tjerë dhe, natyrisht, nuk dëshiron ta ndalë luftën”, deklaroi presidenti ukrainas.

Zelensky la të hapur mundësinë e ngrirjes së vijës aktuale të frontit si hap drejt një armëpushimi dhe negociatave, por përjashtoi mundësinë që Ukraina të heqë dorë nga territoret që kontrollon.

“Për ne, toka është shumë e rëndësishme, sepse bëhet fjalë për njerëzit. Nuk bëhet fjalë për kilometra”, theksoi ai, duke shtuar se Ukraina nuk do t’i njohë territoret e pushtuara si pjesë të Rusisë.

Ndërkohë, pavarësisht pretendimeve të Trumpit se qasja e Ukrainës në versionin ushtarak të Starlink është rikthyer, burime të cituara nga CNN thonë se shërbimi nuk funksionon plotësisht në të gjitha njësitë ukrainase.

Zelensky theksoi se Ukraina ka nevojë urgjente për raketa më të avancuara të mbrojtjes ajrore, pasi rezervat aktuale nuk mjaftojnë për t’u mbrojtur nga sulmet ruse.

Në një zhvillim tjetër, presidenti ukrainas njoftoi se Finlanda do t’i ofrojë Ukrainës një paketë të re mbështetjeje me vlerë 300 milionë euro.

Dy vendet ranë dakord gjithashtu të forcojnë bashkëpunimin, veçanërisht në përdorimin e kapaciteteve satelitore dhe mbrojtjen e infrastrukturës energjetike.

Zelensky tha se vendi i tij ka nevojë për dy gjëra kryesore nga aleatët: të mos lehtësojnë sanksionet ndaj Putinit dhe të sigurojnë raketa më të mira për mbrojtjen e Ukrainës. /Telegrafi/