Kryetari i Gjykatës Themelore në Pejë, Shemsedin Haxhiaj, ka bërë të ditur për Klan Kosovën se ka nisur procesi i inspektimit lidhur me rastin ku viktima dhe personi që dyshohet se e ka kërcënuar janë urdhëruar të jetojnë nën të njëjtin kulm, me një distancë prej dy metrash.

Duke u përgjigjur në pyetjen se si e vlerëson vendimin e gjyqtarit në këtë rast, Haxhiaj tha se vendimet gjyqësore nuk i komentojnë, por konfirmoi se janë ndërmarrë veprime për shqyrtimin e lëndës.

Ai bëri të ditur se kryesuesi i Këshillit Gjyqësor të Kosovës e ka autorizuar drejtorin e inspektimit, së bashku me dy inspektorë, për të shqyrtuar lëndët përkatëse në fushën civile dhe penale.

Sipas Haxhiajt, pas shqyrtimit të lëndëve, inspektorët do të hartojnë një raport të detajuar lidhur me veprimet e ndërmarra nga gjykata.

Ai shtoi se gjykata nuk ka dashur të dalë me një komunikatë zyrtare pa u konfirmuar fillimisht informacionet nga inspektorët që i kanë marrë lëndët në shqyrtim.