Komuna e Prizrenit ka njoftuar se nga e hëna, 2 nëntor 2026, do të nisë zbatimi i programit për subvencionimin e transportit urban, përmes të cilit disa kategori të qytetarëve do të përfitojnë udhëtim falas.

Sipas njoftimit të Komunës, subvencionimi do të bëhet me 1.20 euro për kilometër, për një periudhë pesëvjeçare, me mundësi vazhdimi.

Nga ky program do të përfitojnë personat e dalë nga lufta dhe familjarët e tyre, pensionistët, personat me aftësi të veçanta, policët, pjesëtarët e ushtrisë, zjarrfikësit, punëtorët e arsimit, shërbyesit civilë, nxënësit dhe studentët.

Komuna ka bërë të ditur se gjatë javës së ardhshme qytetarët do të mund të pajisen me kartela përkatëse në zyrat e caktuara, varësisht nga kategoria të cilës i përkasin.

Sipas Komunës, ky program synon të lehtësojë shpenzimet e udhëtimit për qytetarët dhe të përmirësojë qasjen në transportin publik. /Telegrafi/