Derbi mes Galatasarayt dhe Fenerbahçes, i fituar 2-1 nga skuadra vendase, u shoqërua me tensione të mëdha pas përfundimit të ndeshjes.

Sipas mediave turke, situata u përshkallëzua pas vërshëllimës së fundit, kur futbollistët e të dy skuadrave u përfshinë në përplasje.

Në qendër të tensioneve ishin edhe Kerem Akturkoğlu dhe Roland Sallai, ndërsa pati përplasje edhe mes Archie Brownit dhe Abdülkerim Bardakcit.

Pamjet e publikuara nga mediat turke tregojnë se situata doli jashtë kontrollit, duke detyruar policinë të ndërhynte për të ndarë futbollistët. Tensionet raportohet se vazhduan edhe në tunelin që çon drejt dhomave të zhveshjes.

Sipas raportimit të beIN Sports, gjyqtari Atilla Karaoglan nxori kartonë të kuq pas përleshjes. Abdülkerim Bardakci i Galatasarayt dhe Archie Brown i Fenerbahçes raportohet se u ndëshkuan me të kuq.

Në disa raportime përmendet edhe një përplasje fizike mes Brownit dhe Bardakcit, por rrethanat e plota të incidentit duhet të konfirmohen nga pamjet dhe raporti zyrtar i ndeshjes. /Telegrafi/