Esmeralda Hasani është emëruar drejtoreshë e Shërbimit Informativ Shtetëror. Presidenti Begaj dekretoi sot emërimin e saj, pas shkarkimit të Vlora Hysenit.
Kjo e fundit është në arrest shtëpiak për ndihmë ndaj biznesmenit Ergys Agasi, i akuzuar për dosjen ‘AKSHI’, ndërsa ky i fundit ishte në arrati dhe ndante sekrete shtetërore.
Hasani shërbeu si këshilltare në Zyrën e Kryeministrit. Ajo ka qenë gjithashtu pjesë e strukturës së SHISH pasi drejtoi Departamentin e Mbështetjes. Sipas njoftimit të Presidencës, emri i saj u propozua nga Kryeministri.
Kush është Esmeralda Hasani, gruaja që merr drejtimin e SHISH? Nga Zyra e Kryeministrit te kreu i shërbimit sekret shqiptar
Ajo u diplomua për të Drejtë Ndërkombëtare në Universitetin Shtetëror të Milanos. Gjithashtu, ajo përfundoi studimet Master në Planifikim dhe Zhvillim Projektesh në Shkollën e Biznesit të Inovacionit në Bruksel.
Aktiviteti i saj profesional është i përqendruar në procesin mësimor në fushën e së Drejtës Evropiane.
Në këtë drejtim, ajo zotëron njohuri të thella të të gjithë procesit të udhëtimit të Shqipërisë drejt marrjes së statusit të vendit kandidat për anëtarësim në Bashkimin Evropian.
Në fushën e menaxhimit të projekteve, ajo ka fituar përvojë të gjerë në të gjitha fazat e zhvillimit të tyre, duke filluar nga krijimi i partneriteteve, konceptimi i idesë dhe hartimi i projektit, deri te shkrimi dhe zbatimi i tij.
Nga shtatori 2015 deri në shtator 2019, ajo shërbeu si Drejtore Ekzekutive e Institutit Barleti për Kërkim dhe Zhvillim, duke arritur rezultate të shkëlqyera.
Ajo është eksperte e pavarur e Komisionit Evropian në fushën e kërkimit dhe inovacionit, dhe është e angazhuar në mënyrë aktive në projekte kërkimore, arsimore dhe inovative në nivel kombëtar dhe ndërkombëtar, në bashkëpunim me kompani, universitete dhe qendra kërkimore kryesore në të gjithë botën.
Në këtë kontekst, ajo u përzgjodh së fundmi nga Misioni i Organizatës Ndërkombëtare për Migracionin (IOM) në Shqipëri si Konsulente Ndërkombëtare për Zhvillimin e Projekteve.
Nga shtatori 2017 deri në dhjetor 2018, ajo ishte pjesë e kabinetit të Ministrit të Shtetit për Diasporën, në cilësinë e këshilltares dhe shefes së kabinetit, duke dhënë një kontribut të rëndësishëm në procesin e krijimit dhe konsolidimit të institucioneve të reja për diasporën.
Ajo është krijuesja dhe autorja e projektit “Angazhimi i Diasporës Shqiptare në Zhvillimin Social dhe Ekonomik të Shqipërisë”, duke garantuar suksesin e propozimit të projektit.
Që nga shtatori i vitit 2019, ajo drejton Institutin Adriapol – Rritje e Mençur dhe Kreative.
Njoftimi i plotë:
Presidenti i Republikës, SH.TZ Bajram Begaj, në mbështetje të neneve 92, shkronja “f” dhe 93 të Kushtetutës, si dhe nenit 5, të ligjit nr. 8391, datë 28.10.1998, “Për Shërbimin Informativ Shtetëror”, i ndryshuar”, me propozimin e Kryeministrit, me dekretin nr. 595, datë 12.11.2026, dekretoi sot emërimin e znj. Esmeralda Hasani në pozicionin e Drejtoreshës së Shërbimit Informativ Shtetëror.
Përpara dekretit, kryheshin të gjitha procedurat e verifikimit ligjor të parashikuara me ligj për rastet e emërimit në detyrë të zyrtarëve në pozicione të larta.
Burimi: Insajderi
