Zgjedhjet e mesmandatit të vitit 2026 përfunduan me një valë të fortë në favor të demokratëve, duke ndryshuar balancën e pushtetit në Washington dhe, potencialisht, edhe hartën e garës presidenciale për vitin 2028.

Suksesi i demokratëve në disa shtete tradicionalisht republikane mund të hapë rrugë të reja drejt 270 votave elektorale dhe të ndryshojë formulën klasike të një fushate fituese presidenciale.

Në anën tjetër, republikanët po përballen me pyetjen nëse duhet ta rindërtojnë koalicionin MAGA të Donald Trumpit apo të kërkojnë një drejtim të ri politik.

Ende askush nga dy partitë nuk ka shpallur zyrtarisht kandidaturën për president në vitin 2028, por gara mund të nisë shumë më herët sesa pritet.

Ja si duken disa nga emrat potencialë pas rezultateve të mesmandatit.

Josh Shapiro

Guvernatori i Pensilvanisë është një nga fituesit më të mëdhenj politikë të këtyre zgjedhjeve. Ai fitoi rizgjedhjen me më shumë se 20 pikë përqindjeje diferencë, ndërsa demokratët në shtetin e tij fituan katër ulëse në Dhomën e Përfaqësuesve.

Shapiro tashmë ka një bilanc fitues në një nga shtetet kyçe për zgjedhjet presidenciale. Deri tani ai i ka shmangur pyetjet për një kandidaturë presidenciale, por kjo do të bëhet gjithnjë e më e vështirë.

Gavin Newsom

Guvernatori i Kalifornisë hyri fuqishëm në betejën kombëtare duke mbështetur rishikimin e hartës së distrikteve kongresionale të shtetit, si kundërpërgjigje ndaj ndryshimeve të bëra më herët në Teksas.

Ky proces pritet t’u ketë ndihmuar demokratëve të fitojnë pesë ulëse në Dhomën e Përfaqësuesve, çka i jep Newsomit kredite politike të rëndësishme.

Ai po i afrohet fundit të mandatit si guvernator, por ambiciet e tij kombëtare mbeten të qarta.

Së fundmi, Newsom njoftoi edhe komutimin e dënimeve me vdekje për të gjithë 548 personat në korridorin e vdekjes në Kaliforni, duke u pozicionuar në kontrast të drejtpërdrejtë me Trumpin.

Raphael Warnock

Senatori demokrat nga Georgia mund të jetë po ashtu një emër serioz në diskutimet për vitin 2028.

Nëse rruga e re e demokratëve drejt shumicave kalon përmes votuesve me ngjyrë në jug të SHBA-së, Warnock mund të ndërtojë një argument të fortë politik.

Ai zhvilloi një fushatë intensive në shumë shtete dhe, para zgjedhjeve, i tha CNN-it se në vitin 2028 do të kandidonte për një “post të lartë”, pa sqaruar nëse bëhej fjalë për një mandat tjetër në Senat apo për presidencën.

Pete Buttigieg

Ish-kryetari i South Bend dhe ish-sekretari i Transportit mbetet një nga figurat më aktive të demokratëve.

Gjatë zgjedhjeve të mesmandatit ai udhëtoi në 38 shtete, duke mbështetur kandidatë dhe duke krijuar lidhje politike në të gjithë vendin.

Buttigieg mund të paraqitet si një figurë që komunikon si me bazën tradicionale demokrate, ashtu edhe me votuesit e shteteve të mesme amerikane.

JB Pritzker

Guvernatori i Illinoisit fitoi lehtësisht rizgjedhjen, por ndikimi i tij u pa edhe jashtë shtetit.

Pritzker investoi financiarisht në disa gara të rëndësishme, përfshirë atë për guvernator në Teksas, ku mbështeti kandidaten demokrate Gina Hinojosa.

Këto investime mund t’i japin atij kapital politik dhe mbështetje në një garë të ardhshme kombëtare.

Andy Beshear

Guvernatori demokrat i Kentucky, një shtet tradicionalisht republikan, mund të jetë një prej figurave që përfiton më shumë nga suksesi i kandidatëve të moderuar.

Ai drejtoi Shoqatën e Guvernatorëve Demokratë, e cila ndihmoi në zgjedhjen e demokratëve të rinj në Ohio, Iowa, Kansas dhe Teksas.

Beshear ka argumentuar se politika amerikane nuk duhet parë vetëm si “e kuqe kundër së kaltër” apo “ne kundër atyre”, një mesazh që mund të ketë peshë nëse demokratët kërkojnë një kandidat më të moderuar.

Kamala Harris

Ish-zëvendëspresidentja mbetet në diskutim pavarësisht humbjes në zgjedhjet presidenciale të vitit 2024.

Ajo do të duhej të rindërtonte entuziazmin brenda bazës demokrate, por gjatë mesmandatit bëri disa lëvizje strategjike, përfshirë fushata në Mississippi dhe Michigan.

Megjithatë, për Harrisin mbetet sfida e distancimit nga humbja e vitit 2024.

Alexandria Ocasio-Cortez

Kongresistja nga New Yorku gëzon një profil kombëtar dhe një mbështetje të fortë në krahun progresiv të Partisë Demokratike.

Gjatë viteve të fundit ajo ka moderuar disa prej qëndrimeve të saj, një zhvillim i rëndësishëm në një kohë kur fitoret më të mëdha të demokratëve erdhën nga kandidatët e moderuar në shtete republikane.

Jon Ossoff

Senatori demokrat nga Georgia ka deklaruar disa herë se nuk është i interesuar për një kandidaturë presidenciale.

Megjithatë, pas suksesit të demokratëve në jug, spekulimet rreth tij pritet të shtohen, shkruan CNN.

Rizgjedhja e tij dhe fuqizimi i demokratëve në Georgia mund ta shndërrojnë Ossoffin në një nga figurat më të përfolura për vitin 2028.

Rahm Emanuel

Ish-ambasadori, ish-kryetari i Chicagos dhe ish-shefi i stafit të Barack Obamës po shfaqet vazhdimisht në media.

Ai po promovon një platformë më të moderuar, të fokusuar në arsim, rezultate konkrete dhe funksionim të qeverisë.

Megjithëse nuk ka të njëjtën energji elektorale si disa kandidatët më të rinj, Emanuel po punon për ta mbajtur veten në diskutim.

Republikanët

JD Vance

Zëvendëspresidenti mbetet një nga emrat kryesorë për trashëgiminë politike të Trumpit.

Pas humbjeve republikane në mesmandat, Vance fajësoi sidomos luftën me Iranin për rezultatet e dobëta.

Nëse dëshiron të udhëheqë koalicionin MAGA në vitin 2028, ai do të duhet të gjejë një mënyrë për të ruajtur bazën e Trumpit, duke u përballur njëkohësisht me lodhjen e votuesve nga politika e administratës aktuale.

Ron DeSantis

Florida ishte një nga shtetet republikane që i rezistoi valës demokrate.

DeSantis argumentoi se humbjet e republikanëve mund të kishin qenë edhe më të rënda po të mos ishte për rezultatet në Florida.

Mandati i tij si guvernator po përfundon, por ambiciet presidenciale nuk duken se kanë marrë fund.

Marco Rubio

Sekretari i Shtetit u shfaq në disa tubime me Trumpin, por qëndroi relativisht larg fushatës partiake.

Kjo mund ta ndihmojë atë të shmangë një pjesë të kostos politike të humbjeve republikane.

Trump madje bëri shaka gjatë një tubimi se Rubio po bëhej “shumë popullor”.

Nëse do të kërkonte presidencën, Rubio do të duhej të largohej nga administrata dhe me shumë gjasë të hynte në përplasje direkte me Vancen.

Ted Cruz

Senatori nga Teksasi ishte shumë aktiv gjatë fushatës, por rezultatet në shtetin e tij nuk ishin ato që republikanët shpresonin.

Shumë prej kandidatëve që ai mbështeti nuk fituan, çka mund të kufizojë rrjetin e tij të mbështetjes në një garë presidenciale.

Pete Hegseth

Sekretari i Mbrojtjes mund të përballet me një periudhë të vështirë politike.

Ka spekulime për një nismë të mundshme për shkarkimin e tij, ndërsa lufta me Iranin – me të cilën ai lidhet drejtpërdrejt – konsiderohet nga disa republikanë si një nga faktorët që dëmtuan partinë në zgjedhje.

Nëse votuesit kërkojnë kandidatë më të moderuar dhe bashkëpunues, Hegseth do të duhej të ndryshonte ndjeshëm profilin e tij politik.

Sarah Huckabee Sanders

Guvernatorja e Arkansasit dhe ish-zëdhënësja e Shtëpisë së Bardhë fitoi lehtësisht rizgjedhjen.

Ajo mund të ndërtojë një argument për një kandidaturë kombëtare edhe mbi trashëgiminë politike të familjes së saj, pasi babai i saj, Mike Huckabee, kishte performuar mirë në Iowa gjatë fushatave të tij presidenciale.

Tucker Carlson

Komentatori konservator ka qenë një nga kritikët më të hershëm të luftës dhe politikës së jashtme të administratës.

Ai ka përmendur edhe mundësinë e një kandidature të tretë, jashtë dy partive kryesore.

Edhe pse një skenar i tillë mbetet i pasigurt, Carlson mund të ketë ndikim të madh në përplasjet e brendshme që po shfaqen brenda koalicionit MAGA.

Në fund, rezultatet e mesmandatit kanë bërë që gara për vitin 2028 të duket shumë më e hapur.

Demokratët po shohin shtete dhe koalicione të reja si mundësi për të zgjeruar hartën elektorale, ndërsa republikanët po përballen me një debat të brendshëm: të vazhdojnë me modelin e Trumpit apo të kërkojnë një formulë të re politike. /Telegrafi/