Aktiviteti mblodhi personalitete të jetës publike, bashkëluftëtarë dhe bashkatdhetarë, të cilët u bashkuan për të nderuar jetën, veprën dhe sakrificën e një prej luftëtarëve të Ushtrisë Çlirimtare të Kosovës (UÇK).

Në kuadër të akademisë, fjalë rasti mbajtën Kudusi Lama, Jakup Nura, Nasim Haradinaj, Sanije Rexha dhe Bedri Shala. Përmes fjalimeve dhe kujtimeve të tyre, ata sollën dëshmi dhe vlerësime mbi rrugëtimin jetësor, veprimtarinë atdhetare dhe kontributin e Abedin Rexhës – “Sandokanit” në luftën për lirinë e Kosovës.

Një vëmendje e veçantë iu kushtua rëndësisë së ruajtjes së kujtesës historike dhe përcjelljes së vlerave të sakrificës, qëndresës dhe përkushtimit ndaj atdheut te brezat e rinj.

Folësit theksuan rëndësinë e nderimit të atyre që kontribuuan në rrugën drejt lirisë dhe të ruajtjes së trashëgimisë së tyre historike.

Dimension të veçantë kësaj akademie i dha prania e Sanije Rexhës, bashkëshortes dhe bashkëluftëtares së Abedin Rexhës.

“Kujtimet dhe dëshmitë që lidhen me jetën e heroit përbëjnë një pjesë të rëndësishme të historisë së tij personale dhe të kontributit të tij në luftën çlirimtare. Abedin Rexha – “Sandokani” mbetet një figurë e lidhur me luftën për çlirimin e Kosovës dhe sakrificën e luftëtarëve të Ushtrisë Çlirimtare të Kosovës. Emri dhe veprimtaria e tij vazhdojnë të kujtohen nga bashkëluftëtarët, familjarët dhe bashkatdhetarët, si pjesë e kujtesës historike të popullit shqiptar”, u tha në akademi.

Akademia Përkujtimore në Winterthur dëshmoi përkushtimin e mërgatës shqiptare në Zvicër për të ruajtur kujtesën kombëtare dhe për të nderuar figurat që kontribuuan në rrugën e Kosovës drejt lirisë.

Përmes këtij organizimi, bashkatdhetarët riafirmuan rëndësinë e ruajtjes së historisë dhe të përcjelljes së saj te brezat e ardhshëm, duke e konsideruar kujtesën historike një përgjegjësi të përbashkët dhe një pjesë të rëndësishme të identitetit kombëtar.

Burimi: RTKLive