Manchester City ka pësuar një humbje befasuese në shtëpi nga Brightoni, duke u mposhtur me rezultat 1-0 në kuadër të javës së nëntë të Ligës Premier.

Ndeshja u vendos që në minutën e 11-të, kur Yasin Ayari realizoi golin e vetëm të takimit. Pas një aksioni të mirë të vendasve, Maxim De Cuyper zgjodhi të pasonte te bashkëlojtari i tij, ndërsa Ayari me një goditje të saktë e dërgoi topin në rrjetë për 0-1.

City u përpoq të reagonte dhe krijoi disa mundësi të mira për të barazuar. Iliman Ndiaye pati një rast të shkëlqyer në minutën e 22-të, por goditja e tij me kokë përfundoi jashtë portës. Në minutën e 30-të, Josko Gvardiol u rrëzua në zonë pas një kontakti me kundërshtarin, por gjyqtari nuk akordoi penallti.

Brightoni pati mundësinë ta dyfishonte epërsinë në fund të pjesës së parë, ndërsa në pjesën e dytë City shtoi presionin në kërkim të golit të barazimit.

Ndiaye u ndal nga një pritje e shkëlqyer e portierit Bart Verbruggen, i cili e devijoi topin në shtyllë në minutën e 52-të. Dhjetë minuta më vonë, portieri i Brightonit bëri një tjetër pritje vendimtare, kësaj radhe ndaj goditjes së Matheus Nunes.

Në minutat e fundit, City vazhdoi të kërkonte golin, por Verbruggen ishte sërish protagonist. Në minutën e 89-të, ai ndali goditjen e Abdukodir Khusanovit, ndërsa Nico O’Reilly nuk arriti ta shfrytëzonte topin e kthyer, duke dërguar me kokë topin fare pranë shtyllës.

Kështu, Brightoni arriti të ruante epërsinë deri në fund dhe të merrte tri pikë të rëndësishme në udhëtim.

Pavarësisht humbjes, Manchester City mbetet në krye të tabelës me 21 pikë, të paktën deri në përfundim të të gjitha ndeshjeve të kësaj xhiroje./Telegrafi/