Liverpooli ka shënuar fitore ndaj Brightonit në kuadër të xhiros së tetë të Ligës Premier, duke u ngjitur në vendin e katërt me 15 pikë, vetëm një më pak se kundërshtari i tij, që renditet i treti.

Skuadra e Liverpoolit kaloi në epërsi në minutën e 17-të, kur Pascal Gross shënoi autogol pas devijimit të një goditjeje na Florian Wirtz.

Vetëm katër minuta më vonë, Alexander Isak e dyfishoi epërsinë, duke përfituar nga asistimi i Bradley Barcolas dhe duke e dërguar topin në rrjetën e zbrazët për 2-0.

Brightoni pati mundësi të mira për të reaguar. Yasin Ayari humbi një rast të pastër në minutën e 15-të, ndërsa në të 36-tën goditja e tij nga distanca u ndal nga shtylla e djathtë. Megjithatë, pjesa e parë u mbyll me epërsinë prej dy golash të Liverpoolit.

Në pjesën e dytë, Luka Vuskovic rrezikoi nga gjuajtja e lirë në minutën e 61-të, por topi përfundoi pak mbi traversë. Liverpooli iu afrua golit të tretë në minutën e 73-të, kur Barcola goditi ngushtë jashtë shtyllës së djathtë.

Ndeshja u shoqërua edhe me disa zëvendësime, përfshirë daljen e Florian Wirtzit për shkak të lëndimit në minutën e 65-të. Pavarësisht përpjekjeve të Brightonit, Liverpooli e ruajti epërsinë dhe mori tri pikë të rëndësishme në garën për kreun e tabelës.

Me këtë fitore, Liverpooli shkon në kuotën e 15 pikëve dhe ngjitet në vendin e katërt, një pikë prapa Brightonit, që mban pozitën e tretë. /Telegrafi/