Ushtruesi i detyrës së Kryeprokurorit të Prokurorisë Speciale të Republikës së Kosovës, Dren Paca, ka marrë një vendim të rëndësishëm, përmes të cilit ndryshohen procedurat për regjistrimin e lëndëve dhe inicimin e hetimeve sipas detyrës zyrtare, raporton Gazeta Sinjali.
Sipas vendimit të ri, prokurorët specialë tash e tutje mund të kërkojnë drejtpërdrejt nga Zyra e Regjistrit numrin për regjistrimin e lëndës, me qëllim të inicimit të hetimeve sipas detyrës zyrtare, pa pasur nevojë të marrin paraprakisht autorizimin e Kryeprokurorit.
Ky ndryshim është bërë përmes plotësimit dhe ndryshimit të Udhëzuesit për veprimtarinë ditore të Zyrës së Regjistrit në Prokurorinë Speciale.
Në komunikatën e lëshuar më 20 tetor 2026, Prokuroria Speciale ka bërë të ditur se vendimi është marrë në përputhje me kompetencat dhe pavarësinë funksionale të prokurorëve.
Me këtë vendim synohet eliminimi i një hapi administrativ, duke ua lehtësuar prokurorëve procedurën për inicimin e hetimeve të veprave penale që bien në kompetencën e Prokurorisë Speciale.
Ndryshimi pritet të mundësojë një procedurë më të drejtpërdrejtë të regjistrimit të lëndëve, pa qenë i nevojshëm autorizimi paraprak i Kryeprokurorit për këtë hap.
Nga Prokuroria Speciale është theksuar se ky vendim synon gjithashtu të nxisë prokurorët në inicimin e hetimeve sipas detyrës zyrtare.
Institucioni ka ritheksuar përkushtimin në luftën kundër krimit të organizuar, korrupsionit dhe hetimin e të gjitha veprave penale që bien në kompetencën e tij, në përputhje me legjislacionin në fuqi.
Sinjali – aty ku e vërteta flet para lajmit!
Burimi: Sinjali
