Kompania Rajonale e Ujësjellësit “Prishtina” ka njoftuar se ka shkyçur mbi 15 konsumatorë brenda kryeqytetit për shkak të borxheve të papaguara.

Përmes një postimi në Facebook, kompania ka bërë të ditur se masat janë ndërmarrë ndaj bizneseve dhe amvisërive që kanë obligime të papërmbushura ndaj ujësjellësit.

KRU “Prishtina” ka paralajmëruar se aksionet do të vazhdojnë dhe se ekipet e saj janë në terren, ndërsa lista e konsumatorëve që do të përballen me masa të tilla po plotësohet.

“Nuk ka më kohë për shtyrje! Shlyeni borxhin SOT”, thuhet në apelin e kompanisë drejtuar konsumatorëve. /Telegrafi/