Ministri i Punëve të Jashtme dhe Diasporës, Glauk Konjufca, ka reaguar ndaj deklaratave të ministrit të Jashtëm të Serbisë, Marko Gjuriq, në mbledhjen e Këshillit të Sigurimit të OKB-së, duke e kritikuar për mos përmendjen e shqiptarëve të vrarë gjatë luftës në Kosovë.
Konjufca, duke folur për aktgjykimin e fundit të Dhomave të Specializuara të Kosovës ndaj ish-krerëve të Ushtrisë Çlirimtare të Kosovës (UÇK), ka thënë se Gjuriq nuk i përmendi 12 mijë shqiptarët e vrarë gjatë luftës.
“ Asnjë fjalë nga ministri Gjuriq për 12 mijë shqiptarët e vrarë. Këtë e quaj unë mohim të drejtësisë”, ka deklaruar Konjufca.
Ai ka theksuar se Kosova ka bashkëpunuar me Tribunalin e Hagës dhe gjykatat e tjera për ndjekjen dhe dënimin e krimeve të luftës, pa marrë parasysh përkatësinë etnike të kryerësve.
Duke folur për Dhomat e Specializuara, Konjufca ka thënë se ato janë themeluar me insistimin e aleatëve të Kosovës, si përgjigje ndaj pretendimeve të Serbisë se pjesëtarë të UÇK-së kishin kryer vepra të rënda, përfshirë trafikimin e organeve.
“E kemi ditur që nga fillimi që këto kanë qenë fabrikime me qëllim të diskreditimit të forcës sonë mbrojtëse dhe luftës sonë çlirimtare”, ka deklaruar Konjufca.
Sipas tij, Dhomat e Specializuara kanë sqaruar se UÇK-ja nuk është në gjykim dhe se aktgjykimi nuk synon ta zhvlerësojë luftën çlirimtare apo shpalljen e pavarësisë së Kosovës.
Ndërsa, sa u përket dënimeve të shqiptuara ndaj ish-krerëve të UÇK-së, Konjufca ka thënë se ato përmbajnë gabime dhe ka shprehur pritjen që këto të korrigjohen gjatë procedurës së apelit.
Sinjali – aty ku e vërteta flet para lajmit!
Burimi: Sinjali
