Trajneri i Bayern Munichut, Vincent Kompany, u rikthye në zyrën e tij në ‘Säbener Straße’ këtë mëngjes, pothuajse tre javë pasi u rrëzua në stërvitje dhe përfundoi në spital me një diagnozë të acarimit të meningjeve.

Sipas gazetarit të Bild, Philipp Kessler, trajneri belg duhet të mbikëqyrë programet e rikuperimit të lojtarëve të lënduar për momentin, ndërsa rikthimi i tij në stol pritet në ndeshjen e Bundesligës kundër Kolnit më 20 nëntor. Bayern ende nuk e ka konfirmuar zyrtarisht rikthimin e trajnerit të tyre.

Kompany u rrëzua më 23 tetor, ndërsa po shihte ekipin e dytë të Bayernit duke u stërvitur në qendrën stërvitore të klubit. Ai u dërgua menjëherë në spitalin Klinikum rechts der Isar të Mynihut, ku kaloi pothuajse një javë.

Drejtori sportiv i Bayernit, Max Eberl, i tha ARD-së në atë kohë se shkaku i kolapsit ishte acarimi i meningjeve, i cili është i ndryshëm nga meningjiti sepse nuk përfshin inflamacion. Pasi doli nga spitali, Kompany vazhdoi shërimin e tij në shtëpi, dhe Eberl përsëriti vazhdimisht se vendimi për rikthimin e tij do të merrej vetëm nga mjekët.

Në mungesë të tij, ekipi drejtohej nga ndihmësi Aaron Danks, dhe gjatë asaj periudhe Bayerni mposhti bindshëm Magdeburgun në Kupën e Gjermanisë dhe vazhdoi ecurinë e tij në Bundesligë.

Presidenti nderit i klubit, Uli Hoeness, njoftoi të dielën në programin “Sonntags-Stammtisch” në Bayerischer Rundfunk se Kompany do të ishte në stol “pas pushimit ndërkombëtar”, brenda dy deri në tre javësh. Hoeness tha në atë kohë se trajneri ishte nën shumë stres, duke punuar 12 orë në ditë, gjashtë ditë në javë. /Telegrafi/