Përfaqësuesja e Lartë e Bashkimit Evropian për Politikë të Jashtme, Kaja Kallas, ka tërhequr vëmendjen te vazhdimësia e metodave të politikës sovjetike në qasjen e Rusisë së Vladimir Putinit ndaj Perëndimit.

Në një deklaratë, Kallas ka përshkruar tri taktika që, sipas saj, Moska vazhdon t’i përdorë: paraqitjen e kërkesave për gjëra që nuk i përkasin, ushtrimin e presionit përmes ultimatumeve dhe kërcënimeve, si dhe pritjen që me kalimin e kohës dikush në Perëndim të jetë i gatshëm të bëjë lëshime.

Sipas saj, taktika e parë konsiston në kërkimin e vazhdueshëm të territoreve apo përfitimeve që nuk kanë qenë kurrë në pronësi të Rusisë.

Kjo pasohet nga vendosja e ultimatumeve dhe kërcënimeve, me synimin për të ushtruar presion ndaj palëve të tjera.

Taktika e tretë, sipas Kallas, është pritja. Ajo thekson se Moska mund të mbështetet në faktin se gjithmonë do të ketë zëra në Perëndim që do të jenë të gatshëm t’i ofrojnë Rusisë lëshime që më parë nuk i kishte arritur.

“Gjithmonë do të ketë njerëz në Perëndim të gatshëm të të ofrojnë diçka që më parë nuk e ke pasur”, është mesazhi i saj.

Përmes kësaj deklarate, Kallas ka paralajmëruar për rrezikun që kërkesat e vazhdueshme dhe kërcënimet e Moskës të shpërblehen me lëshime nga vendet perëndimore, duke krijuar hapësirë për kërkesa të reja në të ardhmen. /Telegrafi/