Roli i Jack Dawson në “Titanik” iu ofrua fillimisht Johnny Depp-it, por ai hoqi dorë pasi pati vështirësi të lexonte rreth 15 faqe të skenarit. Megjithatë, siç tha ai, e dinte që filmi do të ishte një sukses i madh.

“Titanik” është një nga filmat më të suksesshëm në historinë e kinemasë dhe shënoi një pikë kthese në karrierën e Leonardo DiCaprio-s dhe Kate Winslet. Sot është e vështirë të imagjinohet dikush tjetër në rolin e Jack Dawson dhe dihet pak se roli iu ofrua për herë të parë Johnny Depp-it.

Sipas revistës Far Out, një vit para premierës, Deppit iu dha mundësia të njihej me skenarin e James Cameron dhe të merrte në konsideratë rolin kryesor.

“E pata të vështirë të lexoja rreth 15 faqe të skenarit për Titanikun. Ishte e tmerrshme. Dua të them, nuk mund ta duroja,” tha ai dikur.

Aktori u largua shpejt nga projekti. Çuditërisht, pavarësisht përshtypjes së keqe që i la skenari, ai ishte i vetëdijshëm për potencialin e filmit.

“E dija që Titaniku do të ishte një sukses i madh”, tha Depp.

Megjithatë, ai nuk ishte i vetmi aktor i përmendur për këtë rol. Ndër emrat e lidhur me projektin ishin Matthew McConaughey, Ethan Hawke, Chris O’Donnell, Christian Bale dhe Paul Rudd. /Telegrafi/

– YouTube youtu.be