Një peshkatar gjerman ka zënë një mustak gjigant, të gjatë 2.92 metra, gjatë një gare peshkimi në qytetin Rybnik, në jug të Polonisë.

Oliver Schäfer, 34 vjeç, së bashku me partnerin e tij holandez të peshkimit, Kevin Cremers, mori pjesë në garën që u mbajt më 10 dhe 11 tetor, ku konkurruan rreth 150 peshkatarë, të ndarë në 70 ekipe nga vende të ndryshme të Evropës.

Schäfer kuptoi se kishte kapur një peshk të jashtëzakonshëm kur ai doli për herë të parë në sipërfaqen e ujit.

Përpjekjet për ta nxjerrë zgjatën më shumë se 30 minuta, ndërsa Cremers manovronte varkën kundër erës.

Pasi e nxorën në breg, gjyqtarët matën mustakun dhe konstatuan se ai ishte i gjatë 292 centimetra. Më pas, peshku u rikthye në liqen, në përputhje me rregullat e garës.

Schäfer shpjegoi se mustakët nxirren në breg mbi një pëlhurë të posaçme, për të mos dëmtuar shtresën mbrojtëse të pjesës që mbulon trupin e tyre.

Megjithëse kapën peshkun gjigant, Schäfer dhe Cremers nuk arritën ta fitojnë garën, e cila u vendos në bazë të pikëve të përgjithshme. Dyshja përfundoi në vendin e dytë me 28.930 pikë.

Gjatë garës, ata peshkuan edhe për shandanë, një lloj peshku grabitqar i njohur si zander, duke kapur një ekzemplar të gjatë 81 centimetra, i cili u ndihmoi të grumbullonin pikë shtesë. /Telegrafi/