Deputeti i Aleancës, Ramush Haradinaj ka marrë pjesë në ceremoninë përkujtimore të organizuar në sheshin “Edith Durham” në Prishtinë, në nderim të ushtarëve britanikë që humbën jetën në konflikte të armatosura, veçanërisht gjatë shërbimit në Kosovë.

Përmes një postimi, Haradinaj ka bërë të ditur se në këtë ceremoni janë bashkuar me aleatët strategjikë të Kosovës për të shënuar Aktin e Përkujtimit.

Ai ka theksuar se kjo ditë shënon përkujtimin e të rënëve të Britanisë së Madhe dhe Commonwealth-it që nga Lufta e Parë Botërore.

“Në këtë ditë, kur Britania e Madhe dhe Commonwealth-i kujtojnë të rënët që nga Lufta e Parë Botërore, shprehëm respektin tonë të thellë për sakrificën e luftëtarëve britanikë”, ka shkruar Haradinaj.

Ai ka shprehur respekt të veçantë për ushtarët britanikë që humbën jetën në Kosovë, duke vlerësuar sakrificën e tyre për paqen dhe lirinë.

“Përkulemi me nderim para sakrificës së të gjithë të rënëve britanikë, veçanërisht të atyre që kanë rënë në Kosovë”, ka theksuar Haradinaj. /Telegrafi/