Gjykata Supreme Federale e Zvicrës ka vendosur se autoritetet nuk mund t’i detyrojnë operatorët e internetit të bllokojnë faqe të caktuara pa një bazë të qartë ligjore.

Vendimi erdhi pas ankesës së kompanisë zvicerane të internetit Init7, e cila kundërshtoi një urdhër të Prokurorisë së Kantonit Vaud për bllokimin e disa faqeve të dyshuara për përfshirje në mashtrime online.

Rasti lidhej me një platformë investimesh në bursë, përmes së cilës dyshohet se dhjetëra persona ishin mashtruar për një shumë që tejkalon 1.7 milionë franga zvicerane.

Në korrik të vitit 2025, prokuroria kishte kërkuar nga operatorët e internetit që të bllokonin qasjen në faqet përkatëse, me qëllim parandalimin e viktimave të tjera.

Megjithatë, Gjykata Supreme vlerësoi se dispozitat e përgjithshme të procedurës penale nuk përbëjnë bazë të mjaftueshme ligjore për të urdhëruar bllokimin e faqeve të internetit.

Sipas saj, masa të tilla mund të zbatohen vetëm kur parashikohen shprehimisht me ligj, shkruan SRF, transmeton Telegrafi.

Gjykata theksoi se bllokimi i faqeve nuk prek vetëm personat e dyshuar për vepra penale, por edhe operatorët e internetit dhe përdoruesit e tjerë.

Për këtë arsye, zgjerimi i kompetencave të autoriteteve në këtë fushë duhet të bëhet përmes ndryshimeve ligjore dhe jo përmes interpretimeve të dispozitave ekzistuese.

Edhe pse gjykata pranoi se bllokimi i faqeve mund të jetë një instrument efektiv në luftën kundër mashtrimeve online dhe krimit kibernetik, ajo nënvizoi se çdo ndërhyrje e tillë duhet të ketë mbështetje të qartë ligjore.

Ndërkohë, Qeveria federale zvicerane ka propozuar ndryshime në Ligjin për Telekomunikacionin, të cilat do të mundësonin bllokimin e faqeve në raste të caktuara të mashtrimeve.

Deri në krijimin e një baze të tillë ligjore, autoritetet nuk mund të urdhërojnë bllokime duke u mbështetur vetëm në dispozitat e përgjithshme të procedurës penale./Telegrafi/