Komuna e Gjilanit ka përfunduar inventarizimin e hapësirave të dedikuara për pensionistët, pas renovimit të zyrave, me qëllim të krijimit të kushteve më të mira për funksionalizimin e tyre.

Drejtoresha e Shëndetësisë dhe Mirëqenies Sociale në Gjilan, Mimoza Kadriu Qerimi, ka theksuar se synimi është që pensionistët të kenë një ambient të përshtatshëm për takime, aktivitete të ndryshme dhe kalimin e kohës së lirë.

“Pensionistët meritojnë hapësira të përshtatshme ku mund të takohen, të organizojnë aktivitete dhe të kalojnë kohën së bashku. Do të vazhdojmë të angazhohemi që ata të kenë kushte sa më të mira dhe një ambient ku ndihen të vlerësuar dhe të respektuar”, ka thënë Kadriu Qerimi.

Sipas njoftimit të komunës, me funksionalizimin e këtyre hapësirave, Aktivi i Grave Pensioniste dhe pensionistët e tjerë do të kenë një ambient të dedikuar për aktivitete sociale dhe ruajtjen e lidhjeve shoqërore. /Telegrafi/