Gjermania do të vazhdojë ta mbështesë Kosovën në rrugën e saj drejt integrimit evropian, ka deklaruar ambasadori gjerman në Kosovë, Rainer Rudolph, gjatë një takimi me anëtarët e Komisionit për Punë të Jashtme dhe Diasporë të Kuvendit të Kosovës.

Sipas njoftimit të ambasadës gjermane, në këtë takim është diskutuar për ambiciet evropiane të Kosovës dhe mënyrat e forcimit të marrëdhënieve dypalëshe mes dy vendeve.

Ambasadori Rudolph ka theksuar se Gjermania mbetet e përkushtuar në mbështetjen e agjendës evropiane të Kosovës, duke inkurajuar anëtarët e komisionit që punën e nevojshme për këtë proces ta çojnë përpara me ritëm të plotë.

“Gjermania mbetet e përkushtuar për ta ndihmuar Kosovën në rrugën e saj drejt integrimit evropian”, thuhet në njoftim.

Po ashtu, ambasada ka vlerësuar se me institucione plotësisht të mandatuara dhe pa bllokada, Kosova tashmë i ka kushtet për të krijuar një bazë për përparim të qëndrueshëm.

“Është koha për të krijuar kushte për përparim të qëndrueshëm”, thuhet më tej në njoftim.

Në fund, ambasada gjermane ka rikonfirmuar se Kosova mund të llogarisë edhe më tej në mbështetjen e Gjermanisë në procesin e saj të integrimit evropian.

Sinjali – aty ku e vërteta flet para lajmit!
/GazetaSinjali/

Burimi: Sinjali