Gjermania po shqyrton mundësinë e futjes në treg të një lloji të ri benzine, E20, e cila do të përmbajë deri në 20 për qind bioetanol.

Karburanti i ri synon të ulë kostot e furnizimit dhe të rrisë përdorimin e biokarburanteve, por nuk do të jetë i përshtatshëm për të gjitha automjetet, veçanërisht për disa modele më të vjetra.

Ministri gjerman i Transportit, Steffen Bilger, po mbështet këtë nismë dhe po bashkëpunon me homologun e tij francez për rritjen e përqindjes së biokarburanteve në benzinë.

E20 do të përmbajë dyfish më shumë etanol sesa benzina E10, e cila aktualisht përdoret në Gjermani. Etanoli është një lloj alkooli që mund të prodhohet nga lëndë të para bimore dhe përdoret si përbërës i karburanteve.

Një nga përparësitë e pritshme të E20 është çmimi më i ulët krahasuar me benzinën tradicionale. Përveç kësaj, përdorimi i bioetanolit synon të kontribuojë në uljen e ndikimit mjedisor të transportit.

Megjithatë, përpara se karburanti të ofrohet gjerësisht, Gjermania duhet të ndryshojë standardet për cilësinë e benzinës, të cilat aktualisht lejojnë përmbajtje deri në 10 për qind etanol. Deri tani, E20 është duke u testuar në Mannheim, në një numër të kufizuar automjetesh.

Një nga sfidat kryesore është përputhshmëria me automjetet që tashmë qarkullojnë në rrugë. Veturat që janë miratuar nga prodhuesit për përdorimin e karburanteve me përmbajtje më të lartë etanoli mund të jenë të përshtatshme, por për modelet e tjera nevojitet verifikim i veçantë.

Përqindja më e lartë e etanolit mund të ndikojë në disa pjesë të sistemit të furnizimit me karburant, përfshirë zorrët, guarnicionet dhe komponentët metalikë. Në automjetet që nuk janë projektuar për këtë lloj përzierjeje, ekziston rreziku i konsumimit më të shpejtë të pjesëve dhe i korrozionit.

Etanoli gjithashtu ka përmbajtje më të ulët energjetike sesa benzina, prandaj përdorimi i E20 mund të sjellë një rritje të konsumit, varësisht nga automjeti dhe kushtet e vozitjes.

Për këtë arsye, shoferët do të duhet të kontrollojnë udhëzimet e prodhuesit përpara se të përdorin karburantin e ri. Fakti që një veturë mund të përdorë E10 nuk nënkupton automatikisht se është e përshtatshme edhe për E20.

Për momentin, nuk është përcaktuar data e saktë kur E20 mund të dalë në tregun gjerman dhe as çmimi përfundimtar i tij. Nëse nisma miratohet, karburanti i ri mund të sjellë një alternativë për shoferët, por përdorimi i tij do të varet nga përputhshmëria me automjetet dhe rregullat që do të miratohen. /Telegrafi/