Një shtetas ukrainas është arrestuar në Gjermaninë verilindore, nën dyshimin se mblidhte informacione me interes ushtarak për Rusinë, raportojnë agjencitë DPA dhe AFP.
I dyshuari, i identifikuar si Vadim I., u ndalua në Brandenburg, pranë Berlinit, ndërsa pritet të paraqitet para gjykatës të premten.
Sipas Prokurorisë gjermane, ai dyshohet se që nga korriku i vitit 2025 kishte qenë në kontakt, përmes një pale të tretë, me një shërbim të inteligjencës ruse.
Informacionet që dyshohet se kishte mbledhur përfshinin të dhëna mbi prodhimin e automjeteve të blinduara, municioneve dhe eksplozivëve, si dhe informacione për personelin ushtarak dhe instalimet në vendet që shërbejnë për mbrojtjen e krahut lindor të NATO-s.
Sipas autoriteteve gjermane, një pjesë e këtyre informacioneve ishte e disponueshme publikisht, ndërsa të dhëna të tjera dyshohet se ishin siguruar nga persona që punojnë në industrinë evropiane të armëve.
Arrestimi vjen në një kohë kur Gjermania ka rritur vigjilencën ndaj aktiviteteve të dyshuara të sabotimit dhe spiunazhit, të cilat autoritetet ia atribuojnë Rusisë.
Që nga nisja e pushtimit rus të Ukrainës, në shkurt të vitit 2022, në Gjermani janë arrestuar disa persona të dyshuar për spiunazh në favor të Moskës.
Sinjali – aty ku e vërteta flet para lajmit!
Burimi: Sinjali
