Lajm i mirë nga Ferizaj. 13-vjeçari Ismail Qerkinaj, i cili ishte raportuar si person i zhdukur që nga data 1 nëntor, është gjetur mbrëmë në orët e vona të mesnatës.
Mësohet se i mituri ishte larguar disa ditë më parë nga strehimorja në fshatin Dardani të Ferizajt, ku ndodhej nën përkujdesjen e Qendrës për Punë Sociale.
Pas një angazhimi intensive të hetuesve rajonalë në bashkëpunim me Qendrat për Punë Sociale në Ferizaj dhe Deçan, rreth orës 00:15 të datës 5 nëntor, disa qytetarë vigjilentë e kanë vërejtur 13-vjeçarin pranë një qendre tregtare në Ferizaj dhe menjëherë e kanë shoqëruar për në stacionin policor.
Pas intervistimit në prani të hetuesve dhe përfaqësuesve të QPS-së, i mituri është dërguar në një strehimore të sigurt për strehim të përkohshëm, deri në marrjen e një vendimi përfundimtar nga institucionet kompetente.
Policia e Kosovës dhe organet përkatëse po vazhdojnë trajtimin e mëtejshëm të rastit sipas procedurave ligjore.
Sinjali – aty ku e vërteta flet para lajmit!
Burimi: Sinjali
