Përmes një postimi në Facebook, Gërvalla ka njoftuar se në takim është diskutuar për forcimin e mekanizmave të raportimit dhe mbrojtjes së fëmijëve nga dhuna, si dhe për bashkërendimin e përpjekjeve ndërmjet institucioneve dhe shoqërisë civile.

“Projekti i KOMF-it, “Platforma Digjitale për Raportimin dhe Luftimin e Dhunës ndaj Fëmijëve”, është një iniciativë e mbështetur nga Bashkimi Evropian, që synon t’u mundësojë fëmijëve raportimin e dhunës dhe abuzimit përmes një mekanizmi digjital të sigurt, të besueshëm dhe miqësor për ta. Projekti parasheh pilotimin e platformës në 55 shkolla, trajnimin e profesionistëve dhe hartimin e standardeve për trajtimin e rasteve të raportuara, me synim funksionalizimin e saj deri në vitin 2028”, ka shkruar Gërvalla.

Gërvalla ka theksuar se mbrojtja e fëmijëve kërkon që asnjë formë dhune të mos relativizohet dhe asnjë rast të mos mbetet pa trajtimin e duhur.

“Si Koordinatore Kombëtare, do të jem fuqishëm e angazhuar në mbështetje të çdo nisme dhe çdo përpjekjeje që e bën këtë mbrojtje reale, të prekshme dhe të pakushtëzuar”, ka deklaruar ajo.

Burimi: RTKLive