Harry Kane ka arritur majën e futbollit individual duke fituar Topin e Artë 2026, por sulmuesi anglez e ka bërë të qartë se trofetë me skuadrën mbeten prioriteti i tij kryesor.

Ylli i Bayern Munichut ka deklaruar se do ta shkëmbente çmimin më prestigjioz individual me triumfin në Ligën e Kampionëve, trofe që ende nuk e ka fituar në karrierën e tij.

“Trofetë e ekipit janë arsyeja pse luajmë futboll. Aspekti kolektiv është jashtëzakonisht i rëndësishëm. Topi i Artë ishte një nga ndjenjat më të mira që kam përjetuar në jetën dhe karrierën time, por të fitosh Ligën e Kampionëve me Bayern Munichun do të ishte diçka e jashtëzakonshme”, ka thënë Kane, sipas GOAL.

Sulmuesi 33-vjeçar, i cili mposhti konkurrencën e Kylian Mbappes dhe Lamine Yamalit për çmimin individual, ka theksuar se dëshiron të përjetojë emocionet e triumfit në një finale të madhe së bashku me bashkëlojtarët.

“Do ta zgjidhja Ligën e Kampionëve, por kam mundësinë t’i fitoj të dyja. Le të shohim se çfarë do të ndodhë”, ka shtuar kapiteni i Anglisë.

Kane afër rinovimit të kontratës me Bayern Munich

Kane ka folur gjithashtu për trajnerin e Atletico Madridit, Diego Simeone, i cili e kishte vlerësuar lart sulmuesin anglez.

“Dua ta falënderoj Simeonen, i cili është një nga trajnerët më të mirë të kësaj epoke. Jam krenar që marr komplimente nga dikush si ai”, ka deklaruar Kane.

Përveç kësaj, sulmuesi ka dhënë lajme pozitive për tifozët e Bayern Munichut, duke konfirmuar se është shumë pranë nënshkrimit të një kontrate të re me klubin gjerman.

“Do të thosha se bëhet fjalë për ditë, më shumë sesa për javë. Jemi shumë pranë marrëveshjes”, ka zbuluar ai.

Kontrata aktuale e Kane me Bayernin skadon në verën e vitit 2027.

Kane synon të fshijë kujtimin e hidhur të vitit 2019

Ndeshja në Madrid ka një rëndësi të veçantë për Kane, pasi në vitin 2019 ai përjetoi humbjen në finalen e Ligës së Kampionëve me Tottenhamin ndaj Liverpoolit.

Finalja e këtij sezoni është planifikuar të zhvillohet në të njëjtin stadium, Metropolitano, dhe anglezi shpreson që kësaj radhe të përjetojë një fund krejtësisht tjetër.

“Shpresojmë të kemi kujtime të mira nesër. Në fund të vitit mund të kthehemi këtu për finalen e Ligës së Kampionëve. Kemi mundësinë ta fshijmë atë kujtim të dhimbshëm të vitit 2019. Në jetë dhe në futboll duhet të shfrytëzosh mundësinë e radhës”, ka përfunduar Kane. /Telegrafi/