Pas raportimit të Gazetës Sinjali për rastin e pazakontë të ndalimit të pronarit të një lope në Graçanicë, është urdhëruar lirimi i tij. Sinjali mëson se është dhënë urdhri për lirimin e Hashim Miftarit, i cili ishte ndaluar për 48 orë pasi lopa e tij kishte hyrë në oborrin e Gjykatës Themelore, Dega në Graçanicë, ku kishte shkaktuar dëme minimale në gjelbërim.
Rasti kishte ndodhur më 13 nëntor, ndërsa ndaj Miftarit ishte iniciuar procedurë penale për veprën “Asgjësimi apo dëmtimi i pasurisë”, sipas nenit 321 të Kodit Penal të Kosovës.
Vendimi për ndalimin e tij kishte nxitur reagime të ashpra, përfshirë ato të Avokatit Besnik R. Berisha, i cili kishte vënë në pikëpyetje bazën ligjore të privimit nga liria dhe kishte kërkuar përgjegjësi për zyrtarët e përfshirë.
“Liria e njeriut nuk është pronë e prokurorit. Kush e përdor ligjin për t’ia marrë lirinë padrejtësisht një njeriu, duhet ta ndiejë peshën e po atij ligji mbi veten!”, kishte deklaruar Berisha.
Urdhri për lirimin e Miftarit vjen pas raportimeve të Sinjalit për këtë rast, i cili ka ngritur pikëpyetje serioze mbi përdorimin e masës së ndalimit në raport me natyrën e ngjarjes.
Lirimi i urdhëruar nuk nënkupton domosdoshmërisht përfundimin e procedurës penale.
Sinjali – aty ku e vërteta flet para lajmit!
Burimi: Sinjali
