Një krijuese e re e përmbajtjes ka nisur një sfidë të pazakontë: të udhëtojë në të gjithë Indinë me një buxhet prej vetëm 10 mijë rupish.
Rrugëtimin e saj, të cilin po e dokumenton në Instagram dhe YouTube, e kanë ndjekur mijëra përdorues të rrjeteve sociale, transmeton Telegrafi.
Në një video të publikuar në Instagram, ajo tregoi se deri më tani ka vizituar gjashtë shtete indiane, duke shpenzuar vetëm 2 mijë rupi.
“Disa mund të shpenzojnë 10 mijë rupi vetëm për të vizituar një vend, ndërsa qëllimi im është të udhëtoj në të gjithë Indinë”, tha ajo.
Ajo pranoi se nuk është e sigurt nëse buxheti do t’i mjaftojë për të përfunduar udhëtimin, duke shtuar se sfida do të përfundojë sapo t’i shpenzojë të gjitha paratë.
“Ende ka shumë pjesë të Indisë që më kanë mbetur për t’i vizituar. Nuk e di nëse do të arrij ta përshkoj të gjithë vendin me 10 mijë rupi”, u shpreh ajo.
Videoja ka nxitur debat në rrjetet sociale, ku përdoruesit kanë diskutuar nëse është realisht e mundur të udhëtosh në të gjithë Indinë me një shumë kaq të vogël parash.
Disa kanë vënë në pikëpyetje mënyrën se si ajo i mbulon shpenzimet për transportin, ushqimin dhe fjetjen, ndërsa të tjerë kanë argumentuar se sfida mund të realizohet përmes zgjedhjeve ekonomike dhe planifikimit të kujdesshëm.
“Gjithçka varet nga mënyra e transportit, vendi ku qëndron dhe ushqimi që zgjedh”, shkroi një përdorues, ndërsa një tjetër u shpreh se udhëtimi me një buxhet të tillë është i mundur nëse organizohet me kujdes. /Telegrafi/
