Policia austriake ka nisur hetimet ndaj një 21-vjeçari gjerman, i dyshuar për rrezikim të sigurisë publike, pasi dyshohet se e la të braktisur në malin Zugspitze shoqen e tij 17-vjeçare, në temperatura që kishin zbritur disa gradë nën zero.
E mitura u detyrua të kërkonte ndihmë përmes telefonit nga shërbimet e emergjencës. Ajo u gjet në një lartësi prej rreth 2,500 metrash, në gjendje hipotermie, dhe u transportua në spitalin e Garmisch-Partenkirchen, në Gjermani. Pas marrjes së trajtimit mjekësor, ajo u lirua nga spitali.
Zugspitze është mali më i lartë në Gjermani, me një lartësi prej 2,962 metrash.
Sipas raportimeve, dy të rinjtë ishin nisur në orët e para të së dielës nga zona turistike e Ehrwald, në Tirolin austriak, me synimin për të parë lindjen e diellit nga maja e malit.
Megjithatë, kushtet e vështira atmosferike ua vështirësuan ngjitjen. Temperaturat kishin rënë deri në -12 gradë Celsius, ndërsa në disa pjesë të malit dëbora arrinte deri në gjunjë. Për shkak të motit, ata ndryshuan planin për të arritur në majë.
Në një moment gjatë rrugës, dy të rinjtë u ndanë, ndërsa 21-vjeçari vazhdoi zbritjen i vetëm. Rrethanat dhe arsyeja e ndarjes së tyre ende nuk janë bërë të ditura.
Një zëdhënës i Policisë ka refuzuar të komentojë rastin, duke iu referuar hetimeve që janë në zhvillim.
Në operacionin e shpëtimit morën pjesë shtatë shpëtues malorë. Në fund, 17-vjeçarja u evakuua nga mali me helikopter dhe më pas u dërgua me ambulancë në spital.
Në Austri, deri në tre muaj burg për rrezikimin e sigurisë fizike
Sipas legjislacionit austriak, personat që rrezikojnë sigurinë fizike të një personi tjetër mund të dënohen deri në tre muaj burgim.
Pas përfundimit të hetimeve, Policia do t’ia përcjellë raportin Prokurorisë në Innsbruck, e cila do të vlerësojë nëse në këtë rast janë përmbushur elementet e një vepre penale.
Ngjarja ka rikthyer në vëmendje një rast tragjik të ndodhur në janar të vitit 2025, në malin Grossglockner, maja më e lartë e Austrisë. Në atë rast, një 33-vjeçare humbi jetën nga ngrirja pasi partneri i saj e la në mal.
Burri u shpall fajtor për vrasje nga pakujdesia e rëndë. Gjatë gjykimit, ai pretendoi se ishte larguar për të kërkuar ndihmë dhe shprehu pendesë për vdekjen e partneres.
Prokuroria kishte argumentuar se burri, si alpinisti më me përvojë i çiftit, kishte përgjegjësinë për ta drejtuar ngjitjen dhe se nuk ishte kthyer në kohë apo nuk kishte kërkuar ndihmë në momentin e duhur.
Ndërsa në rastin e fundit në Zugspitze, 17-vjeçarja arriti të shpëtohej. Megjithatë, përgjegjësia e 21-vjeçarit dhe rrethanat në të cilat ai u largua nga mali mbeten ende nën hetim.
Sinjali – aty ku e vërteta flet para lajmit!
Burimi: Sinjali
