Ylli botëror me origjinë shqiptare, Dua Lipa, pasuria e së cilës vlerësohet në rreth 150 milionë funte, ka fituar së fundmi një betejë të rëndësishme ligjore.

Këngëtarja 31-vjeçare triumfoi përballë një tregtari nga Hong Kongu, i cili shiste produkte të paautorizuara me emrin e saj, përfshirë veshje, çanta dhe kapele. Organizata Botërore e Pronësisë Intelektuale (WIPO) vendosi se domeni “dualipa-asiastore.com” po përdorej në mënyrë të paligjshme dhe urdhëroi kalimin e menjëhershëm të tij në pronësi të kompanisë së Dua Lipës.

Suksesi ligjor shoqërohet edhe me të ardhura të konsiderueshme financiare. Dokumentet e fundit të kompanisë së saj, “Radical22 Ltd”, të cilën e menaxhon së bashku me babanë e saj, Dukagjin Lipa, tregojnë se këngëtarja ka fituar mesatarisht 64,000 funte në ditë gjatë vitit të kaluar.

Në total, të ardhurat e saj nga muzika, të drejtat e autorit, turnetë dhe produktet arritën në 23.4 milionë funte, ndërsa vetë kompania vlerësohet tani në 73 milionë funte.

Fitimet janë rritur ndjeshëm edhe falë aktiviteteve të saj live. Kompania “Radical22 Live”, e cila menaxhon financat e turneve, regjistroi një fitim neto prej 6.2 milionë funtesh në vitin 2025.

Ndërkohë, turneu i saj botëror me 81 koncerte, “Radical Optimism Tour”, arkëtoi 162 milionë funte vetëm gjatë vitit të kaluar, duke konfirmuar pozicionin e saj si një nga artistet më të suksesshme në botë.

Përveç arritjeve profesionale, Dua Lipa ka folur së fundmi edhe për jetën private, pas martesës luksoze me aktorin Callum Turner, e cila kushtoi 1.5 milionë funte.

Pas ceremonisë zyrtare në Londër dhe dasmës madhështore në Itali, ku morën pjesë emra të njohur si Donatella Versace, Charli XCX dhe Mark Ronson, këngëtarja tregoi se sekreti i ditës së tyre të veçantë ishte të shijonin çdo moment dhe të qëndronin gjithmonë pranë njëri-tjetrit.

Ajo ka theksuar vazhdimisht se me bashkëshortin ndan një gjuhë unike krijuese dhe mbështetje të plotë.

Kjo lumturi e re pritet të sjellë edhe një frymëzim të ri në krijimtarinë e saj muzikore. Dua ka pranuar se, ndonëse më parë e kishte më të lehtë të shkruante këngë dashurie duke u frymëzuar nga dhimbja e zemrës, tani dëshiron të eksplorojë se çfarë ndodh kur gjen dashurinë e vërtetë.

Ajo është shprehur e interesuar të pasqyrojë kompleksitetin e një marrëdhënieje të shëndetshme, momentet e saj të qeta dhe detajet e vogla që e bëjnë atë të veçantë.