Ukraina rrëzon një helikopter rus me dronë kamikazë.

Forcat ukrainase kanë shkatërruar një helikopter ushtarak rus të modelit Mi-8 në rajonin e Luhanskut, duke përdorur dronë kamikazë të tipit “Hornet”.

Sulmi është realizuar me dronë pa pilot, të cilët janë përdorur gjithnjë e më shumë nga ushtria ukrainase për të goditur objektivat ushtarake ruse, përfshirë automjetet e blinduara, sistemet e mbrojtjes ajrore dhe mjetet e aviacionit.

Helikopteri Mi-8 është një prej mjeteve ajrore më të përdorura nga ushtria ruse.

Ai shërben kryesisht për transportin e trupave dhe pajisjeve ushtarake, evakuimin e të plagosurve, si dhe për mbështetjen e operacioneve në terren.

Përdorimi i dronëve kamikazë në luftën në Ukrainë ka ndryshuar ndjeshëm mënyrën e zhvillimit të operacioneve ushtarake, duke u mundësuar njësive në terren të godasin objektiva me kosto më të ulët dhe pa ekspozuar drejtpërdrejt personelin ushtarak.

Megjithatë, deri më tani nuk janë bërë publike detaje të hollësishme për rrethanat e sulmit dhe mënyrën se si helikopteri rus është goditur. /Telegrafi/