Autoritetet doganore në Zvicër kanë sekuestruar mbi dy tonë ushqime të kontrabanduara, të cilat po transportoheshin pa kushte të përshtatshme ftohjeje.

Një nga automjetet ishte edhe i mbingarkuar me afro një ton.

Autoritetet e Doganës dhe Sigurisë Kufitare të Zvicrës kanë zbuluar dy raste të kontrabandës së produkteve ushqimore gjatë kontrolleve të zhvilluara më 17 tetor në Ederswiler dhe Pratteln.

Në rastin e parë, rreth orës 02:30, zyrtarët ndaluan një automjet me targa të kantonit Jura. Gjatë kontrollit, në hapësirën e ngarkesës u gjetën 162 kilogramë mish pule, 258 kilogramë patate të ngrira, 128 kilogramë bukë të sheshtë dhe dhjetë kilogramë miell.

Sipas autoriteteve, për mallrat nuk ishin paguar detyrimet doganore, ndërsa produktet e prishshme transportoheshin pa sistem ftohjeje.

Dy personat që ndodheshin në automjet u detyruan të paguanin disa mijëra franga për detyrimet dhe gjobën. Ushqimet u sekuestruan, shkruan Blick, transmeton Telegrafi.

Në rastin e dytë, pak para orës 05:00, një ekip tjetër doganor ndaloi një furgon në Pratteln, në kantonin Basel-Landschaft.

Në automjet u zbuluan rreth 1.5 tonë patate të ngrira dhe 632 kilogramë bukë të sheshtë. Edhe këto produkte po transportoheshin pa ftohje dhe pa u paguar detyrimet e kërkuara doganore.

Kontrolli zbuloi gjithashtu se furgoni ishte i mbingarkuar me 930 kilogramë mbi peshën e lejuar.

Për shkak se dy personat, shtetas francezë të moshës 20-vjeçare, nuk mundën të paguanin në vend detyrimet dhe gjobën, në vlerë totale prej mbi 10 mijë frangash, autoritetet sekuestruan automjetin. Drejtuesi u raportua për shkeljen lidhur me mbingarkesën.

Autoritetet zvicerane vazhdojnë kontrollet për parandalimin e kontrabandës dhe zbatimin e rregullave doganore e të sigurisë ushqimore./Telegrafi/