Të qarat e një vajze 7-vjeçare kanë alarmuar motrën e saj në Podujevë, e cila, sapo ka hyrë në shtëpi, është përballur me një rrëfim shqetësues. E mitura i ka treguar se ishte goditur me grusht në këmbë nga bashkëshorti i motrës së tyre, i cili ishte martuar në familje vetëm dy muaj më parë.
Burimet e Gazetës Sinjali bëjnë me dije se ngjarja ka ndodhur të shtunën, më 31 tetor, rreth orës 14:20, në rrugën “Bedri Bajrami” në Podujevë, ndërsa i dyshuari është M.M. 33 vjeçar, shtetas nga Shqipëria.
Sipas informacioneve që ka siguruar Sinjali, gjithçka është zbuluar kur motra e të miturës, M.A. 19 vjeçare, ndodhej në oborr dhe ka dëgjuar vajzën duke qarë brenda shtëpisë.
Ajo ka hyrë menjëherë për të kuptuar çfarë kishte ndodhur, ndërsa 7-vjeçarja i ka treguar se kunati e kishte goditur me grusht në gjurin e këmbës së djathtë, duke i shkaktuar dhimbje.
Ankuesja ka deklaruar se bashkëshorti i motrës së tyre ishte martuar rreth dy muaj më parë dhe, që nga ajo kohë, çifti jetonte në shtëpinë e familjes.
Pas denoncimit të rastit, në trajtimin e tij është përfshirë edhe Qendra për Punë Sociale, ndërsa e mitura është intervistuar nga punonjësi social.
Në Polici është marrë në pyetje edhe i dyshuari, në praninë e avokatit mbrojtës.
Ai ka mohuar se e ka sulmuar fizikisht vajzën.
Megjithatë, pas konsultimit me Prokurorinë e Shtetit, ndaj tij është urdhëruar ndalimi prej 48 orësh, ndërsa rasti është iniciuar si “Dhunë në familje”.
Hetimet vazhdojnë për sqarimin e rrethanave dhe verifikimin e pretendimeve të paraqitura në denoncim.
Sinjali – aty ku e vërteta flet para lajmit!
Burimi: Sinjali
