Deputetja e Partisë Demokratike të Kosovës (PDK), Vlora Çitaku, ka deklaruar se ligji për mbrojtjen e Ushtrisë Çlirimtare të Kosovës (UÇK) do të rishqyrtohet në Kuvend brenda katër javësh dhe do të hyjë në fuqi brenda afateve të parapara.

Përmes një postimi në Facebook, Çitaku ka thënë se kërkesa e PDK-së për rikthimin e ligjit në Kuvend nuk nënkupton tërheqje nga kjo nismë dhe as ndryshim të qëndrimit të partisë.

“Ligji që mbron UÇK-në do të kalojë! Po e them që në fillim, pa lënë vend për dilema: brenda katër javësh, ligji do të rishqyrtohet në Kuvend dhe do të hyjë në fuqi brenda afateve të parashikuara. Ky është zotimi ynë dhe do t’i qëndrojmë deri në fund”, ka shkruar ajo.

Çitaku ka thënë se i kupton shqetësimet e qytetarëve që e kanë mbështetur ligjin dhe se mirëpret kritikat e bazuara, por ka theksuar se qëndrimi i PDK-së mbetet i pandryshuar.

Sipas saj, procesit i janë dhënë edhe katër javë kohë, me qëllim të largimit të çdo paqartësie, forcimit të bazës juridike të ligjit dhe sigurimit të zbatimit të tij në praktikë.

“Për PDK-në dhe brenda PDK-së, nuk ka asnjë temë tjetër përveç jetësimit të këtij ligji, për të cilin jemi plotësisht të bashkuar dhe të vendosur”, ka deklaruar Çitaku.

Në fund, deputetja e PDK-së u është drejtuar qytetarëve që protestuan, mbështetësve të partisë dhe të gjithë atyre që përkrahën nismën, duke përsëritur se zotimi për miratimin e ligjit do të realizohet.

“Zotimi që kemi marrë para jush qëndron. Dhe këtë do ta çojmë deri në fund!”, ka shkruar tutje Çitaku./Telegrafi/