Disa ilaçe kundër alergjisë dhe kundër të përzierave, kafeja, alkooli, si dhe netët pa gjumë mund të rrisin simptomat e sindromës së këmbëve të shqetësuara. Paradoksi është se me kalimin e kohës, disa ilaçe për trajtimin e këtij çrregullimi mund t’i përkeqësojnë ato.

Sindroma e këmbëve të shqetësuara shkakton ndjesi të pakëndshme në këmbë dhe një dëshirë të fortë për t’i lëvizur ato, më shpesh në mbrëmje dhe natën, kur një person është duke pushuar. Është më e zakonshme tek gratë dhe zakonisht fillon në moshën e mesme, sipas Institutit Kombëtar të Çrregullimeve Neurologjike dhe Goditjes në Tru (NINDS) të SHBA-së .

Shkaku i saktë është i panjohur, por ekspertët përmendin një numër faktorësh që mund të shkaktojnë ose përkeqësojnë simptomat. Disa prej tyre mund të shmangen nga vetë personi.

Ilaçe nga farmacia në shtëpi

Sipas NINDS, simptomat mund të përkeqësohen nga disa ilaçe kundër të përzierave, antipsikotikë, ilaqe kundër depresionit që rrisin nivelet e serotoninës dhe disa antihistaminikë, ilaçe që përdoren për të trajtuar alergjitë.

Megjithatë, ekspertët theksojnë se një ilaç i përshkruar nga një mjek nuk duhet të ndërpritet me iniciativën tuaj. Nëse simptomat përkeqësohen pas fillimit të një terapie të re, duhet të flisni me mjekun tuaj për një zëvendësim të mundshëm.

Kafeja, alkooli, cigaret dhe mungesa e gjumit

Kafeina, alkooli dhe nikotina janë lidhur me sindromën e këmbëve të shqetësuara. Zvogëlimi ose eliminimi i tyre është një nga këshillat e para nga ekspertët. Mungesa e gjumit dhe çrregullimet e gjumit si apnea gjithashtu mund të përkeqësojnë simptomat.

NINDS këshillon një orar të rregullt gjumi, aktivitet fizik të moderuar dhe të rregullt, masazh këmbësh, një banjë të ngrohtë dhe kompresa me ujë të nxehtë ose të ftohtë.

Mungesa e hekurit

Nivelet e ulëta të hekurit në tru mund të kontribuojnë në zhvillimin e këtij sindromi. Mungesa e hekurit mund ta shkaktojë ose ta përkeqësojë atë, sipas Klinikës Mayo . Ndër arsyet e zakonshme të mungesës janë menstruacionet e rënda, dhurimet e shpeshta të gjakut dhe gjakderdhja në stomak ose zorrë. Dështimi i veshkave gjithashtu mund të ulë nivelet e hekurit dhe të përkeqësojë simptomat.

Kjo është arsyeja pse mjekët kontrollojnë nivelin e hekurit në gjak në këtë sindromë. Profesori John Winkelman i Spitalit të Përgjithshëm të Masaçusetsit shpjegoi për HCPLive se një ferritinë nga 15 deri në 20, të cilën laboratorët shpesh e konsiderojnë normale, është shumë e ulët për njerëzit me këtë sindromë. Testet klinike kanë treguar se qëllimi për ta është ferritina mbi 100 dhe ngopja e transferrinës mbi 20 përqind.

Kur trajtimi përkeqëson simptomat

Barnat që veprojnë mbi dopaminën kanë qenë prej kohësh zgjedhja e parë e trajtimit. Tek disa pacientë, me kalimin e kohës ato çojnë në të ashtuquajturën përkeqësim: simptomat fillojnë më herët gjatë ditës, bëhen më të forta dhe përhapen në pjesë të tjera të trupit.

Prandaj, Akademia Amerikane e Mjekësisë së Gjumit nuk i rekomandon më këto barna si terapi standarde në udhëzimet e vitit 2024.

Simptomat gjithashtu përkeqësohen gjatë shtatzënisë, veçanërisht në tremujorin e fundit, por zakonisht zhduken pas lindjes. Kushdo që vëren se këmbët e shqetësuara po i prishin rregullisht gjumin duhet të vizitojë një mjek.