Në një intervistë të re, vokalisti i U2, Bono, kritikoi ashpër administratën e Donald Trump.

Megjithatë, ai tha se nuk dëshiron t’i largojë njerëzit që votojnë për Partinë Republikane.

“Nëse mund ta ndani bisedën rreth kësaj administrate nga biseda rreth të majtës dhe të djathtës, konservatorëve dhe liberalëve, atëherë mund të vazhdoj. Sepse mendoj se ky është një moment i jashtëzakonshëm. Mendoj se kjo është grabitja më e madhe në historinë e botës: vjedhja e Amerikës. Dhe nuk është një film grabitjeje. Është reale dhe po ndodh”, tha Bono për The New York Times.

Ai shtoi se nuk dëshiron t’i largojë njerëzit e mirë që votojnë konservatorët dhe republikanët.

“Partia e tyre është rrëmbyer, është një marrje agresive e Partisë Republikane. Dua t’i thërras ata të kthehen. Dua që të kthehen, sepse njerëzit votojnë konservatorë për të gjitha llojet e arsyeve që janë në rregull. Nëse mund të flasim për këtë pa argumentet e zakonshme, ky është një problem serioz”, tha Bono.

Bono foli gjithashtu për shkurtimet e zbatuara nga Departamenti për Efikasitetin e Qeverisë (DOGE). Në krye të këtij organi në fillim të mandatit të dytë të Trump ishte Elon Musk. Bono tha se humbja e jetës njerëzore që do të pasojë për shkak të shkurtimeve të DOGE është “e papranueshme”. Në bisedë, ai preku edhe fenë.

«Të besosh në Zot, ose se Zoti është dashuri, ka qenë jashtëzakonisht e lehtë në jetën time», tha ai.

Anëtarët e grupit thonë se albumi i ri ka të bëjë me gjetjen e gëzimit në një botë politikisht të pasigurt. Ata janë të bindur se këngët dhe performancat e tyre më të mira ende nuk kanë ardhur.

“Ne me të vërtetë mendojmë se mund të shkruajmë këngën më të mirë që kemi shkruar ndonjëherë që javën tjetër,” thanë ata.

Albumi i tyre i ri “Carnaval De Luz” publikohet më 13 nëntor. /Telegrafi/