Numri i kërkesave për azil në Bashkimin Evropian ka shënuar rënie të ndjeshme gjatë korrikut, me rreth 39 për qind më pak aplikime krahasuar me të njëjtën periudhë të vitit të kaluar.
Sipas të dhënave të Eurostatit, gjatë korrikut 34.145 persona paraqitën për herë të parë kërkesë për mbrojtje ndërkombëtare në vendet e BE-së, krahasuar me 55.680 kërkesa të regjistruara në korrikun e vitit paraprak.
Rënie është shënuar edhe në krahasim me muajin qershor, kur numri i kërkesave ishte tetë për qind më i lartë.
Franca regjistroi numrin më të madh të aplikimeve për azil, me 9.000 kërkesa, e ndjekur nga Italia me 5.140, Greqia me 3.715, Spanja me 3.590 dhe Gjermania me 3.075.
Këto pesë shtete pranuan së bashku rreth 72 për qind të të gjitha kërkesave të para për azil të regjistruara në Bashkimin Evropian gjatë korrikut.
Megjithatë, në raport me numrin e banorëve, Sllovenia shënoi shifrën më të lartë, me 114,7 kërkesa për çdo 100 mijë banorë. Pas saj u renditën Greqia me 35,8 dhe Luksemburgu me 16,6, ndërsa mesatarja e BE-së ishte 7,6 kërkesa për çdo 100 mijë banorë.
Sa u përket vendeve të origjinës, shtetasit e Afganistanit kryesuan listën me 3.100 kërkesa, të ndjekur nga ata të Sudanit me 2.605, Bangladeshit me 2.255 dhe Sirisë me 1.420 kërkesa.
Ndërkohë, gjatë të njëjtit muaj u regjistruan edhe 1.290 kërkesa për azil nga të mitur të pashoqëruar nga prindërit ose kujdestarët e tyre.
Numri më i madh i këtyre kërkesave u regjistrua në Slloveni, me 265, e ndjekur nga Greqia me 245 dhe Holanda me 210.
Eurostati ka bërë të ditur se të dhënat e fundit përfshijnë ndryshime metodologjike që lidhen me zbatimin e Paktit të BE-së për Migracionin dhe Azilin, i cili nisi të zbatohej në qershor të vitit 2026.
Të dhënat tregojnë se, pavarësisht rënies së përgjithshme të kërkesave për azil, dallimet mes shteteve anëtare mbeten të mëdha, veçanërisht në raport me numrin e banorëve.
Sinjali – aty ku e vërteta flet para lajmit!
Burimi: Sinjali
