Barcelona mund të përballet me një gjobë pas incidenteve të regjistruara gjatë El Clasicos të së dielës kundër Real Madridit, ndërsa La Liga ka hapur edhe një hetim të veçantë për një incident të pretenduar ndaj Eduardo Camavingas.

Sipas “Mundo Deportivo”, Komiteti Disiplinor i La Ligës e ka trajtuar të mërkurën rastin e hedhjes së sendeve në fushë, që ndodhi pas golit të dytë të Kylian Mbappes në fitoren e Real Madridit ndaj Barcelonës.

Gjyqtari Juan Martinez Munuera raportoi se në minutën e 87-të, nga tribuna veriore, u hodhën një shishe uji dhe një kanaçe pijeje në drejtim të fushës. Kjo pjesë e stadiumit frekuentohet kryesisht nga tifozët vendas, por asnjëri prej sendeve nuk goditi ndonjë lojtar.

Pas incidentit, gjyqtari aktivizoi fazën e parë të protokollit për hedhjen e sendeve, ndërsa përmes sistemit të zërimit të stadiumit u dha një paralajmërim për tifozët. Loja u ndërpre për pak çaste derisa u bë njoftimi.

Komiteti e klasifikoi rastin si shkelje të lehtë, në bazë të nenit 117 të Kodit Disiplinor. Për këtë arsye, Barcelona rrezikon një gjobë deri në 602 euro, ndërsa dënimi në nivelin e mesëm do të ishte 301 euro. Shuma përfundimtare do të varet nga shkalla e shkeljes që do të përcaktohet.

Ndërkohë, një hetim i veçantë është hapur edhe për një incident të pretenduar ndaj mesfushorit të Real Madridit, Eduardo Camavinga, gjatë festimit pas golit të dytë të Mbappes.

Sipas raportimit, disa tifozë dyshohet se e kanë goditur francezin në kokë me shtiza flamujsh. La Liga e ka raportuar rastin, i cili do të shqyrtohet përmes procedurave përkatëse disiplinore.

Ky hetim është i ndarë nga rasti i hedhjes së sendeve drejt lojtarëve të Real Madridit dhe ende nuk ka një vendim përfundimtar.

Këto incidente vijnë pas një jave të vështirë për Barcelonën, e cila pësoi dy humbje radhazi ndaj Paris Saint-Germainit dhe Real Madridit./Telegrafi/