Një amerikan nga Idaho dhe djali i tij shtatëvjeçar kanë fituar secili titullin e katërt në Librin e Rekordeve Guinness, pasi arritën të thyejnë një rekord në lojën “Hungry Hungry Hippos”, duke luajtur me sy të lidhur.

David Rush, i cili mban më shumë se 200 rekorde Guinness, u bë sërish pjesë e një sfide me djalin e tij, Peter. Këtë herë, ata synuan të përfundonin lojën në kohën më të shkurtër të mundshme, pa parë.

Dyshja arriti ta përfundonte sfidën për vetëm 7.03 sekonda, duke tejkaluar objektivin fillestar prej 20 sekondash të Guinness World Records, transmeton Telegrafi.

Babë e bir kishin vendosur edhe më parë disa rekorde në këtë lojë. Ata mbanin rekordin për kohën më të shpejtë të përfundimit të lojës nga një ekip prej dy personash, me 5.36 sekonda, si dhe nga një ekip prej katër personash, me 3.53 sekonda.

David Rush mban gjithashtu rekordin individual, me 7.29 sekonda, ndërsa Peter ka qenë pjesë e ekipit që vendosi rekordin për grupmoshat nën 16 vjeç, me kohën 5.18 sekonda.

Duke komentuar sfidën, David Rush tha se loja me sy të lidhur ishte njëkohësisht më e lehtë dhe më e vështirë sesa me sy hapur.

Sipas tij, mungesa e shikimit eliminonte shpërqendrimet dhe hezitimin, pasi lojtarët nuk mund t’i ndiqnin me sy rruazat që lëviznin në mënyrë të paparashikueshme. Megjithatë, vështirësia më e madhe ishte gjetja e levës së vogël plastike pa e parë atë.

Rush shpjegoi se rregullat e Guinness kërkonin që pjesëmarrësit ta nisnin sfidën me dorën aktive të vendosur rrafsh mbi tavolinë, gjë që e bënte më të vështirë gjetjen e levës vetëm përmes kujtesës muskulore.

Ai shtoi se më vonë kishte mësuar që një ekip tjetër kishte arritur kohën 15.57 sekonda, por rezultati i tyre ende nuk ishte verifikuar në momentin kur ai dhe djali i tij zhvilluan sfidën. Megjithatë, koha prej 7.03 sekondash ishte e mjaftueshme për t’ua siguruar titullin. /Telegrafi/

– YouTube www.youtube.com