Drejtuesit e Roc Nation Sports International, agjencisë që përfaqëson Vinicius Juniorin, kanë treguar se si Arsenali ishte shumë pranë transferimit të yllit të Real Madridit gjatë verës, por në fund vendimtare rezultoi dashuria e brazilianit për gjigantin spanjoll.

“Me Viniciusin, ai shkoi në Madrid në një moshë shumë të re dhe mendoj se ekziston një ndjenjë rehatie, dëshira për të qenë aty dhe për të ndërtuar diçka te Real Madridi”, tha Grant Veitch, drejtor i rekrutimit të futbollistëve afrikanë në Roc Nation.

“Ai ka konkurrencë për një vend në formacion, por bëhet fjalë për klubin më të lartë. Unë u them të gjithë klientëve të mi se karriera e tyre ka arritur kulmin vetëm kur kanë luajtur në një finale të Ligës së Kampionëve me Real Madridin”.

“U shfaqën edhe mundësi të tjera. Por mendoj se ndjenja e rehatisë që ai ka dhe fakti që tashmë është yll te Real Madridi, e mbajtën aty. Ai dëshironte të qëndronte”.

“Sigurisht, mund të provosh një rrugë tjetër, por fakti që është aty që nga një moshë shumë e re, dëshira për ta ndërtuar reputacionin dhe për të vazhduar të fitojë më shumë trofe me Real Madridin, janë arsyet kryesore pse ka qëndruar”, shtoi Veitch.

Presidenti i Roc Nation, Michael Yormack, konfirmoi se Arsenali kishte qenë shumë i angazhuar për transferimin e brazilianit.

“E keni parë lajmin. Arsenali ishte shumë i përfshirë dhe këmbënguli jashtëzakonisht shumë”, shpjegoi Yormack.

“Por, siç tha Grant, zemra e Viniciusit është në Madrid. Aty ka dashur gjithmonë të jetë, aty është dhe shpreson të qëndrojë për pjesën tjetër të karrierës. Nuk mendoj se kjo ka qenë ndonjëherë në dyshim”.

A e kishte marrë Viniciusi seriozisht në konsideratë mundësinë e transferimit te Arsenali?

“Sigurisht që po. Kur një klub si Arsenali të pret me gjithë nderimet dhe të bën të ndihesh vërtet i dëshiruar, natyrisht që duhet ta dëgjosh ofertën”.

“Por ai është aty ku dëshiron të jetë dhe ne jemi të lumtur që ai ndodhet aty. Nuk ndodh shpesh që një futbollist ta nisë karrierën profesionale te një klub dhe ta përfundojë po aty”.

“Ai e nisi rrugëtimin në moshën 18-vjeçare, ndërsa tani është 26 vjeç. Ka fituar tashmë shumë trofe. Të qëndrosh në një klub të vetëm, në klubin më të mirë në botë, gjatë gjithë karrierës do të ishte diçka shumë e veçantë”, përfundoi Yormack./Telegrafi/