E ardhmja e Arda Gülerit te Real Madridi është vënë në pikëpyetje, pasi mesfushori turk raportohet se ka refuzuar ofertën e klubit madrilen për rinovimin e kontratës.
Sipas mediumit turk Ajansspor, Real Madridi i ka ofruar 21-vjeçarit pagë vjetore prej tetë milionë eurosh për të vazhduar bashkëpunimin, por kjo ofertë thuhet se nuk e ka kënaqur futbollistin.
Situatën po e përcjell nga afër Paris Saint-Germaini, i cili raportohet se është i gatshëm të bëjë një investim të madh për ta transferuar talentin turk në Francë.
Sipas raportimeve, kampionët francezë mund të ofrojnë deri në 200 milionë euro për kartonin e Gülerit, vlera e të cilit në tregun e transferimeve vlerësohet në 100 milionë euro nga Transfermarkt.
Përveç kësaj, PSG thuhet se është i gatshëm t’i ofrojë mesfushorit një pagë vjetore prej rreth 22 milionë eurosh, pothuajse trefishi i ofertës që raportohet se ka marrë nga Real Madridi.
Megjithatë, deri më tani nuk ka konfirmim për një ofertë zyrtare të klubit francez apo për nisjen e negociatave mes dy gjigantëve evropianë.
Ndërkohë, raportimet e mëhershme në mediat spanjolle kishin bërë të ditur se Real Madridi dhe përfaqësuesit e Gülerit kishin arritur marrëveshje për rinovimin e kontratës, fillimisht deri në vitin 2031, e sipas raportimeve të tjera deri në vitin 2032.
Kontrata aktuale e futbollistit turk me madrilenët është e vlefshme deri në vitin 2029.
Sinjali – aty ku e vërteta flet para lajmit!
Burimi: Sinjali
