Sllovakia, anëtare e Bashkimit Evropian dhe NATO-s, ka rikthyer marrëdhëniet diplomatike ushtarake me Moskën për herë të parë që nga fillimi i pushtimit rus të Ukrainës në vitin 2022.

Qeveria e kryeministrit Robert Fico ka dërguar tashmë dy oficerë ushtarakë në Rusi, ndërsa në Bratislavë pritet të mbërrijë së shpejti edhe një atashe ushtarak rus.

Vendimi ka nxitur reagime të ashpra nga opozita sllovake dhe ish-zyrtarë të lartë ushtarakë, të cilët paralajmërojnë se Moska mund ta shfrytëzojë praninë e saj diplomatike për spiunazh dhe përhapjen e dezinformatave. Sipas tyre, ky veprim rrezikon të dëmtojë më tej besimin ndërmjet aleatëve të NATO-s.

Qeveria e Ficos, nga ana tjetër, e konsideron rikthimin e kontakteve një hap të nevojshëm për mbledhjen e informacioneve të sigurisë dhe ruajtjen e komunikimit me Rusinë.

Sipas mediave sllovake, njëri prej oficerëve të dërguar në Moskë, Staviarsky, ndodhet atje që nga fillimi i gushtit, shkruan dw.

Ndërkohë, atasheu ushtarak rus Maksim Verezan ka marrë miratimin e autoriteteve sllovake, por ende nuk figuron në listën e diplomatëve ushtarakë të akredituar. Ministria sllovake e Mbrojtjes nuk ka bërë të ditur se kur pritet ai të mbërrijë në Bratislavë.

Opozita vë në pikëpyetje përfitimet që mund të ketë Sllovakia nga ky vendim. Ish-deputeti Martin Poliacik vlerësoi se emërimi i atasheve ushtarakë ka më shumë rëndësi politike sesa praktike, pasi dërgon një sinjal për qëndrimin e qeverisë së Ficos ndaj Rusisë.

Shqetësimet lidhen edhe me një rast të mëparshëm spiunazhi. Në vitin 2021, Sergey Solomasov, atëherë zëvendësatashe ushtarak i ambasadës ruse në Bratislavë, u filmua duke i dorëzuar para Bohush Garbarit, bashkëpunëtor i portalit pro-rus Hlavné správy, në përpjekje për ta rekrutuar. Solomasov u dëbua nga Sllovakia një vit më vonë, ndërsa Garbar u dënua për spiunazh dhe marrje ryshfeti.

Ish-gjenerali sllovak Pavel Macko e cilësoi vendimin e qeverisë si një hap shumë serioz, duke theksuar se situata e sigurisë nuk është përmirësuar që nga viti 2022. Përkundrazi, sipas tij, aktivitetet armiqësore të Rusisë dhe operacionet e saj hibride në rajon vazhdojnë. Macko paralajmëroi gjithashtu se politika pro-ruse e qeverisë mund të dëmtojë shkëmbimin e informacioneve të inteligjencës dhe besimin ndërmjet Sllovakisë dhe aleatëve të saj perëndimorë.

Ndërkohë, Poliacik dyshon se vendimi ka edhe prapavijë elektorale, pasi Fico pritet të synojë rizgjedhjen vitin e ardhshëm. Sipas tij, kryeministri mund të përpiqet ta paraqesë veten si udhëheqësin që ka mundësi të negociojë drejtpërdrejt me presidentin rus, Vladimir Putin, për përfundimin e luftës në Ukrainë.

Poliacik theksoi se, megjithëse Sllovakia vazhdon t’i përmbushë zyrtarisht detyrimet ndaj NATO-s, kjo nuk mjafton për të garantuar besimin politik të aleatëve. “Parashikueshmëria nuk është e njëjtë me besueshmërinë”, përfundoi ai. /Telegrafi/