Aktorja dhe modelja amerikane Hunter Schafer zbuloi se i është nënshtruar një operacioni për ndryshimin e seksit në dhjetor të vitit të kaluar.

Është një procedurë në organet gjenitale që e përshtat trupin me identitetin gjinor të një personi. Aktorja 27-vjeçare, e njohur për rolin e saj si Jules në serialin e HBO-së “Euphoria”, foli për operacionin, të cilin e ka mbajtur për vete deri më tani, në një intervistë për numrin e nëntorit të revistës Elle.

“Ndoshta është mirë ta ndaj këtë. Sapo bëra një operacion në dhjetor, ishte e mrekullueshme dhe më pëlqen shumë”, tha Schafer.

Aktorja shpjegoi se prej kohësh kishte përqafuar një pjesë më fluide gjinore të vetes dhe se ishte përpjekur të jetonte në trupin e saj të mëparshëm sepse ideja i dukej e guximshme dhe e veçantë.

Megjithatë, kjo “pamje teorike” nuk përputhej me botën në të cilën jetonte ose me mënyrën se si donte të ishte e pranishme në të. Në fund, ajo arriti në përfundimin se tranzicioni mjekësor ishte vendimi i duhur për të.

“Unë jam një grua. Unë jam një vajzë”, tha Hunter Schafer në një intervistë.

Schafer foli gjithashtu për shërimin e saj në fillim të këtij viti. Pas operacionit, asaj iu desh të qëndronte në shtrat për një kohë të gjatë, kështu që mori me qira një apartament të madh ku miqtë dhe familja vinin ta vizitonin.

“Mendoj se limiti im ishte 150 hapa në ditë, që nuk është asgjë”, kujtoi aktorja 27-vjeçare.

Hunter Schafer u bë e njohur për publikun në vitin 2016, kur, si nxënëse e shkollës së mesme, ishte ndër paditëset kundër një ligji të Karolinës së Veriut që kërkonte përdorimin e tualeteve publike sipas seksit të caktuar në lindje.

Përveç serialit “Euphoria”, ajo luajti edhe në filmin “The Hunger Games: The Ballad of Songbirds and Snakes”, dhe shikuesit së shpejti mund ta shohin atë në serialin “Blade Runner 2099”.