Derisa Austria po përgatitet për reshje të konsiderueshme bore, Zvicra nuk pritet të përfshihet nga i njëjti mot dimëror. Meteorologët paralajmërojnë një javë me ndryshime të shpeshta të motit, reshje të shumta shiu dhe temperatura relativisht të buta për këtë periudhë të vitit.

Sipas mediumit zviceran Blick, modeli evropian i parashikimit të motit ECMWF paralajmëron reshje bore në disa pjesë të Austrisë gjatë fundjavës, madje edhe në zona me lartësi të ulët. Mundësia e reshjeve të borës përmendet edhe për disa lagje të kryeqytetit Vjenë.

Megjithatë, situata në Zvicër pritet të jetë ndryshe. Meteorologu Klaus Marquardt nga Meteo News thotë se vala e ajrit të ftohtë që pritet të prekë Austrinë do të ketë ndikim të kufizuar në Zvicër, ku bora në zonat e ulëta nuk është në parashikim, transmeton Telegrafi.

Në vend të një shpërthimi dimëror, java e ardhshme pritet të karakterizohet nga reshje të shumta dhe temperatura relativisht të buta.

Kufiri i reshjeve të borës do të mbetet në lartësi më të mëdha, ndërsa në Alpe, për shkak të erës së ngrohtë Föhn, temperaturat mund të arrijnë deri në 15 gradë Celsius.

Megjithatë, e diela pritet të sjellë kushte më të mira atmosferike, veçanërisht në zonat malore.

Në ultësira fillimisht parashikohet mjegull e lartë, me kufirin e saj në 800 deri në 900 metra mbi nivelin e detit, por gjatë ditës ajo pritet të shpërndahet gradualisht.

Në zonat malore, ndërkaq, parashikohet mot me diell gjatë pjesës më të madhe të ditës. Në lartësinë prej 2.000 metrash, temperaturat do të zbresin në një deri në dy gradë nën zero.

Meteorologët rekomandojnë veshje të ngrohta për ata që planifikojnë të kalojnë fundjavën në Alpe, pasi temperaturat atje do të mbeten dimërore, pavarësisht kushteve më të buta që priten në ditët pasuese./Telegrafi/