Një marrëdhënie e pazakontë mes një demi dhe një gomari mashkull ka tërhequr vëmendjen e shkencëtarëve në Etiopi, pasi dy kafshët vazhdimisht kërkonin shoqërinë e njëra-tjetrës, pavarësisht se kishin mundësi të tjera për çiftëzim.
Sipas mediumit britanik “The Sun”, studiuesit zbuluan rastësisht këtë sjellje gjatë një studimi të veçantë për majmunët në Etiopi.
Dy kafshët, të quajtura Achille, demi, dhe Patroclo, gomari mashkull, i përkisnin fermerëve të ndryshëm dhe mund të takoheshin vetëm kur nxirreshin në kullotë.
Gjatë ndërveprimit të parë, studiuesit vunë re se demi tentoi të hipte mbi gomarin nga prapa. Ndryshe nga reagimi që mund të pritej, Patroclo e pranoi afrimin dhe shpesh i përgjigjej duke e kafshuar lehtë Achille-n dhe duke ia afruar pjesën e pasme të trupit.
“Po bënim një pushim të vogël për drekë dhe në distancë pashë diçka që dukej paksa e çuditshme. U thashë kolegëve: ‘Mendoj se pashë një dem duke hipur mbi një gomar’. Ata nuk më besuan”, ka treguar André da Cruz, doktorant dhe një nga autorët e studimit.
Ekspertët nga Universiteti i Pizës regjistruan 51 ndërveprime të tilla brenda vetëm 14 ditësh, edhe pse dy kafshët i përkisnin pronarëve të ndryshëm dhe mund të takoheshin vetëm gjatë kullotjes.
Sipas studiuesve, ndërveprimet nuk kufizoheshin vetëm në tentimet për çiftëzim. Dy kafshët gjithashtu lëpinin, fërkoheshin dhe afroheshin me turinjtë e tyre, duke qëndruar vazhdimisht pranë njëra-tjetrës.
Elisabetta Palagi, autore e studimit, tha se ndërveprimet seksuale mes demit Achille dhe gomarit Patroclo nuk ishin ngjarje të izoluara.
“Ajo që na tërhoqi vërtet vëmendjen ishte se këto ndërveprime ishin të përfshira në një marrëdhënie shoqërore shumë përzgjedhëse dhe të qëndrueshme mes dy individëve”, deklaroi ajo.
Studiuesit theksuan se të dyja kafshët kishin qasje te partnerë të tjerë të mundshëm, përfshirë kafshë të gjinive të ndryshme dhe të specieve të tyre, por vazhdimisht zgjidhnin të qëndronin pranë njëra-tjetrës.
Doktoranti da Cruz tha se dy kafshët kërkonin vazhdimisht shoqërinë e njëra-tjetrës dhe angazhoheshin në sjellje të ndryshme afërsie, si lëpirja, fërkimi dhe afrimi me turinjtë, krahas ndërveprimeve të përsëritura seksuale.
Në dy raste, Achille tentoi të afrohej edhe me një gomar tjetër mashkull. Megjithatë, ai reagoi ndryshe, duke i shfaqur shenja refuzimi dhe kërcënimi, përfshirë tërheqjen e veshëve prapa dhe shprehje kërcënuese të fytyrës.
Autorja kryesore e studimit, Martina Francesconi, tha se gjetja më e rëndësishme nuk ishte vetëm fakti që demi tentonte të çiftëzohej me një gomar mashkull, por se kjo sjellje ishte pjesë e një marrëdhënieje më të gjerë shoqërore dhe përzgjedhëse.
Megjithatë, shkencëtarët nuk kanë arritur të përcaktojnë nëse kjo lidhje nisi si afërsi shoqërore dhe më pas u shndërrua në sjellje seksuale, apo nëse të dyja kanë ekzistuar njëkohësisht.
Sipas studiuesve, marrëdhënia mund të ketë ndihmuar në krijimin e afërsisë, ruajtjen e lidhjes mes tyre ose uljen e tensionit, por nevojiten hulumtime të tjera për të kuptuar motivet e sakta.
Shkencëtarët planifikojnë të zhvillojnë vëzhgime të tjera për të kuptuar më mirë se çfarë i shtyn këto dy kafshë të kërkojnë vazhdimisht njëra-tjetrën.
Sjellja seksuale mes kafshëve të të njëjtit seks është dokumentuar në më shumë se 1,500 specie, përfshirë luanët, delfinët, pinguinët dhe delet. Megjithatë, marrëdhëniet e tilla mes kafshëve të specieve të ndryshme mbeten jashtëzakonisht të rralla.
Sinjali – aty ku e vërteta flet para lajmit!
Burimi: Sinjali
